બોલરોના શાનદાર પ્રદર્શન બાદ, શુભમ શર્માની શાનદાર સદી અને રજત પાટીદાર અને હિમાંશુ મંત્રીની અડધી સદીની મદદથી મધ્ય પ્રદેશે પંજાબને 10 વિકેટે હરાવ્યું.
મધ્યપ્રદેશ પાસે 26 રનનો ટાર્ગેટ હતો જે તેણે છઠ્ઠી ઓવરમાં વિના વિકેટે હાંસલ કરી લીધો હતો. આ જીત સાથે મધ્યપ્રદેશની ટીમે સેમીફાઈનલમાં જગ્યા બનાવી લીધી છે. આ પહેલા પંજાબે ટોસ જીતીને પહેલા બેટિંગ કરવાનો નિર્ણય લીધો હતો, પરંતુ મધ્યપ્રદેશની બોલિંગ સામે ટીમ માત્ર 219 રન બનાવીને ઢગલા થઈ ગઈ હતી. મધ્યપ્રદેશ તરફથી પુનીત દાતે અને અનુબલ અગ્રવાલે 3-3 વિકેટ લીધી હતી.
219 રનના જવાબમાં મધ્યપ્રદેશની ટીમે શુભમ શર્માના 102 રન, રજત પાટીદારના 85 અને હિમાંશુ મંત્રીના 89 રનના આધારે 397 રન બનાવ્યા હતા અને પ્રથમ દાવમાં 178 રનની લીડ મેળવી હતી.
પંજાબની બેટિંગ બીજી ઈનિંગમાં પણ મધ્યપ્રદેશના બોલરો સામે લાચાર રહી અને સમગ્ર ટીમ 203 રન જ બનાવી શકી. પંજાબ તરફથી અનમોલ મલ્હોત્રાએ સૌથી વધુ રન બનાવ્યા હતા. તેણે 34 રનની ઇનિંગ રમી હતી. બીજી ઇનિંગમાં કુમાર કાર્તિકેય મધ્યપ્રદેશનો હીરો રહ્યો હતો જેણે 6 વિકેટ ઝડપી હતી.
મધ્યપ્રદેશને ચોથી ઈનિંગમાં 26 રનનો ટાર્ગેટ મળ્યો હતો, જેને તેણે છઠ્ઠી ઓવરમાં કોઈ વિકેટ વિના સરળતાથી હાંસલ કરી લીધો અને સેમીફાઈનલમાં જગ્યા બનાવી લીધી. ઉત્તર પ્રદેશની ટીમ પહેલાથી જ સેમીફાઈનલમાં પહોંચી ગઈ છે.
રણજી ટ્રોફીની સેમિફાઇનલ મેચો 14 જૂનથી શરૂ થશે, જ્યાં પ્રથમ સેમિફાઇનલ મેચમાં મધ્યપ્રદેશનો મુકાબલો બંગાળ અને ઝારખંડ વચ્ચેની મેચની વિજેતા ટીમ સાથે થશે.