રોડ સેફ્ટી વર્લ્ડ સિરીઝ 2022 અંતર્ગત, ઇન્દોરના હોલકર સ્ટેડિયમમાં રમાયેલી મહત્વની મેચમાં ન્યૂઝીલેન્ડ લિજેન્ડ્સે બાંગ્લાદેશ લિજેન્ડ્સને 8 વિકેટે હરાવ્યું હતું.
વરસાદથી પ્રભાવિત મેચ 11 ઓવરની કરવામાં આવી હતી. બાંગ્લાદેશ લિજેન્ડ્સ તરફથી નજીમુદ્દીન અને એમ. હુસૈન બેટિંગ કરવા આવ્યા હતા. પરંતુ બંને 0 અને એક રન બનાવીને પેવેલિયન પરત ફર્યા હતા. અહેમદે 9 બોલમાં 13 રન બનાવ્યા હતા પરંતુ બાંગ્લાદેશ લિજેન્ડ્સને કપાલી અને ડી. ઘોષે વાસ્તવિક ટેકો આપ્યો હતો જેણે 11 ઓવરમાં ટીમનો સ્કોર 98 રન સુધી પહોંચાડ્યો હતો.
કપાલીએ 21 બોલમાં ત્રણ ચોગ્ગા અને બે છગ્ગાની મદદથી 37 રન બનાવ્યા હતા જ્યારે વિકેટકીપર બેટ્સમેન ડી. ઘોષે 32 બોલમાં ત્રણ ચોગ્ગા અને એક છગ્ગાની મદદથી 41 રન બનાવ્યા હતા. ન્યુઝીલેન્ડ માટે મિલ્સે બે ઓવરમાં 11 રન આપીને બે વિકેટ ઝડપી હતી. હેમિશ બેનેટે 20 રનમાં એક વિકેટ લીધી હતી.
જવાબમાં ન્યૂઝીલેન્ડ લિજેન્ડ્સની ટીમે કેપ્ટન રોસ ટેલરની મદદથી 9.3 ઓવરમાં બે વિકેટ ગુમાવીને લક્ષ્ય હાંસલ કરી લીધું હતું. જોકે, ન્યૂઝીલેન્ડ લિજેન્ડ્સની શરૂઆત ખરાબ રહી હતી. ત્રીજી ઓવરમાં એન્ટોન 2 રન બનાવીને પેવેલિયન પરત ફર્યો હતો. આ પછી જેમ્સ હોવે 17 બોલમાં બે સિક્સરની મદદથી 26 રન બનાવ્યા હતા.
ન્યુઝીલેન્ડને ડીન બ્રાઉનલિન અને સુકાની રોસ ટેલરનો મોટો સાથ મળ્યો. બ્રાઉનલિને 19 બોલમાં ત્રણ ચોગ્ગા અને એક છગ્ગાની મદદથી 31 રન બનાવ્યા હતા. જ્યારે કેપ્ટન રોસ ટેલરે માત્ર 17 બોલમાં ત્રણ સિક્સરની મદદથી 30 રન બનાવ્યા હતા. બાંગ્લાદેશ લિજેન્ડ્સ તરફથી અબ્દુર રઝાકે 12 રનમાં એક વિકેટ ઝડપી હતી. આલોક કપાલીએ 26 રનમાં એક વિકેટ લીધી હતી.