અમેરિકા પહોંચતા જ બદલાયું ઉન્મુક્ત ચંદનું નસીબ, બિગ બેશમાં આ ટીમ માટે રમશે

ભારતીય ક્રિકેટ ટીમના અંડર-19 કેપ્ટન રહેલા ઉન્મુક્ત ચંદને મોટી ટી-20 ક્રિકેટ લીગ રમવાની તક મળી છે. 2012માં અંડર-19 વર્લ્ડ કપ જીતનાર ઉન્મુક્ત ચંદની કારકિર્દીમાં ભારતને એક મોટા સારા સમાચાર મળ્યા છે, જ્યાં તેને ઓસ્ટ્રેલિયાની હાઈપ્રોફાઈલ ટી-20 ક્રિકેટ લીગ બિગ-બેશ લીગમાં રમવાની તક મળી હતી.

ભારતીય ક્રિકેટમાંથી નિવૃત્તિ લીધા બાદ ઉન્મુક્ત ચંદ આ વર્ષે અમેરિકા ગયો હતો, ત્યારબાદ તે ત્યાં જ સ્થાયી થઈ ગયો હતો. જ્યારે તેને ભારતમાંથી ક્રિકેટમાં કરિયર બનાવવાની તક ન મળી ત્યારે તેણે અમેરિકાથી કરિયર બનાવવાનું નક્કી કર્યું. 

ઉન્મુક્ત ચંદે તાજેતરમાં અમેરિકામાં રમાયેલી માઈનોર લીગ ક્રિકેટમાં શાનદાર પ્રદર્શન કર્યું હતું. જ્યાં તેને મેલબોર્ન રેનેગેડ્સની ટીમમાં સામેલ કરવામાં આવ્યો હતો. આવી સ્થિતિમાં હવે આ વર્ષે બિગ-બેશ લીગમાં ઉન્મુક્ત ચંદ મેલબોર્ન રેનેગેડ્સની ટીમ સાથે રમશે.

ઉન્મુક્ત ચંદનો ભારતીય ક્રિકેટમાં જબરદસ્ત ઉદય થયો હતો. જેણે પોતાની કેપ્ટનશીપમાં 2012 અંડર-19 વર્લ્ડ કપ જીત્યો હતો. તે ફાઇનલ મેચમાં ઉન્મુક્તે એકલા હાથે સદીની ઇનિંગ રમીને મેચ જીતી લીધી હતી. આ પછી તેને ભારતીય ક્રિકેટમાં જુનિયર ક્રિકેટર ઓફ ધ યર તરીકે પણ પસંદ કરવામાં આવ્યો હતો.

બીસીસીઆઈને જાણ કર્યા બાદ તેણે અમેરિકા શિફ્ટ થવાનો નિર્ણય કર્યો અને તે ભારત છોડીને અમેરિકા ગયો. ભારતીય ક્રિકેટરોને BCCI દ્વારા IPL સિવાયની કોઈપણ લીગમાં રમવાની મંજૂરી નથી.