ભારત સામેની હાર બાદ આફ્રિદીએ હાર્દિક પંડ્યાને લઈને આપ્યું મોટું નિવેદન..

એશિયા કપમાં ભારત સામેની ટીમની હાર બાદ પાકિસ્તાનના પૂર્વ કેપ્ટન શાહિદ આફ્રિદીએ હાર્દિક પંડ્યા પર મોટી પ્રતિક્રિયા આપી છે. તેણે હાર્દિક પંડ્યાના વખાણ કર્યા અને કહ્યું કે હાર્દિકે જબરદસ્ત પ્રદર્શન કર્યું અને તેની હાજરીનો અહેસાસ કરાવ્યો.

એશિયા કપની તેમની પ્રથમ મેચમાં, ભારતીય ટીમે પાકિસ્તાન સામે જંગી જીત મેળવી હતી અને ટૂર્નામેન્ટની શ્રેષ્ઠ શરૂઆત કરી હતી. દુબઈમાં રમાયેલી આ મેચમાં ભારતે પાકિસ્તાનને 5 વિકેટે હરાવ્યું હતું.

પ્રથમ બેટિંગ કરતા પાકિસ્તાનની ટીમ 19.5 ઓવરમાં 147 રન બનાવીને આઉટ થઈ ગઈ હતી. જવાબમાં રમતા ભારતે 2 બોલ બાકી રહેતા 5 વિકેટે 148 રન બનાવીને મેચ જીતી લીધી હતી. હાર્દિક પંડ્યાએ સિક્સર વડે ટીમ ઈન્ડિયાને જીત અપાવી હતી.

હાર્દિકે પહેલા બોલિંગમાં 3 વિકેટ ઝડપી હતી અને ત્યાર બાદ બેટિંગમાં પણ 17 બોલમાં 4 ચોગ્ગા અને 1 છગ્ગાની મદદથી અણનમ 33 રન બનાવીને ટીમને જીત અપાવી હતી. તેના શ્રેષ્ઠ ઓલરાઉન્ડ પ્રદર્શન માટે તેને પ્લેયર ઓફ ધ મેચ પણ જાહેર કરવામાં આવ્યો હતો.

તે જ સમયે, પાકિસ્તાનના ભૂતપૂર્વ ઓલરાઉન્ડર શાહિદ આફ્રિદીએ પણ પંડ્યાના ખૂબ વખાણ કર્યા છે. તેણે ટ્વીટ કરીને કહ્યું કે, જ્યારે બે મજબૂત ટીમો એકબીજા સાથે લડે છે અને મેચ છેલ્લા બોલ સુધી ચાલે છે, ત્યારે ચાહકો જીતે છે કારણ કે તેઓ તે જ જોવા માંગે છે. જોવા જેવી મેચ હતી. હાર્દિક પંડ્યાએ બંને ઇનિંગ્સમાં પોતાની હાજરીનો અહેસાસ કરાવ્યો હતો. બીજી તરફ પાકિસ્તાન તરફથી નસીમ અને નવાઝે સારું પ્રદર્શન કર્યું હતું.