હું 39 વર્ષનો છું, મને નથી લાગતું કે હું આગળ રમી શકીશ તેથી નિવૃત્તિ લીધી

જોસ બટલરની કેપ્ટનશીપમાં ઈંગ્લેન્ડની ટીમ ટી20 વર્લ્ડ કપ 2024ના સુપર 8 માટે ક્વોલિફાય થઈ ગઈ છે. ઈંગ્લેન્ડે નામિબિયા સામે કરો યા મરો મેચ જીતીને સુપર 8માં સ્થાન મેળવ્યું હતું.

વરસાદના કારણે ઈંગ્લેન્ડ અને નામિબિયા વચ્ચે માત્ર 10 ઓવરની મેચ રમાઈ શકી હતી. જેમાં ઈંગ્લેન્ડની ટીમ આસાનીથી જીતી ગઈ હતી. આ મેચ જીતીને ઈંગ્લેન્ડની ટીમ ઓસ્ટ્રેલિયાની સાથે ગ્રુપ બીમાંથી ક્વોલિફાઈ કરવામાં સફળ રહી હતી.

ઇંગ્લેન્ડ અને નામિબિયા વચ્ચેની મેચ બાદ આ અનુભવી ખેલાડીએ આંતરરાષ્ટ્રીય ક્રિકેટમાંથી નિવૃત્તિની જાહેરાત કરી હતી. વાસ્તવમાં, અમે ડેવિડ વિઝા વિશે વાત કરી રહ્યા છીએ જે નામિબિયા માટે રમે છે. ડેવિડ વિઝાએ આંતરરાષ્ટ્રીય ક્રિકેટમાંથી નિવૃત્તિ જાહેર કરી છે. જો કે, મેચ દરમિયાન તેણે કોઈને જાણ પણ ન થવા દીધી કે આ તેની છેલ્લી મેચ છે. મેચ બાદ તેણે નિવૃત્તિની વાત કરીને બધાને ચોંકાવી દીધા હતા.

ડેવિડ વિઝાએ તેની છેલ્લી મેચમાં ઈંગ્લેન્ડ સામે 12 બોલમાં 27 રનની ઈનિંગ રમી હતી. આ સિવાય તેણે ટીમ માટે એક વિકેટ પણ લીધી હતી. જો કે તેના જોરદાર પ્રદર્શન છતાં ટીમ જીતી શકી ન હતી. T-20 વર્લ્ડ કપમાં ઈંગ્લેન્ડ સામેની હાર સાથે નામિબિયાની સફર ખતમ થઈ ગઈ છે. ઈંગ્લેન્ડ સામે હારીને નામિબિયાની ટીમ T-20 વર્લ્ડ કપમાંથી બહાર થઈ ગઈ છે.

હાર બાદ ડેવિડ વિઝાએ કહ્યું કે તે ક્રિકેટમાંથી સંન્યાસ લઈ રહ્યો છે. તેણે કહ્યું કે તેને લાગે છે કે સંન્યાસ લેવાનો આ યોગ્ય સમય છે. આગામી T20 વર્લ્ડ કપ માટે હજુ 2 વર્ષ બાકી છે અને તે 39 વર્ષનો છે. તેણે કહ્યું કે હું 39 વર્ષનો છું. આવી સ્થિતિમાં મને નથી લાગતું કે હું આગામી સમયમાં T-20 વર્લ્ડ કપ રમી શકીશ. મારામાં એટલું ક્રિકેટ બાકી નથી. નામિબિયા સાથેની મારી સફર શાનદાર રહી છે. હું ખુશ છું કે હું આ ટીમ માટે મારી છેલ્લી આંતરરાષ્ટ્રીય મેચ રમી શક્યો.