ઈંગ્લેન્ડ અને પાકિસ્તાન વચ્ચે 4 મેચની T20 ઈન્ટરનેશનલ સીરીઝની ત્રીજી મેચ 28 મેના રોજ કાર્ડિફમાં રમાશે. જો કે આ પહેલા ઈંગ્લેન્ડની ટીમને મોટો ઝટકો લાગ્યો છે. ઇંગ્લેન્ડનો કેપ્ટન જોસ બટલર પિતૃત્વની રજા પર હોવાના કારણે 28 મેના રોજ પાકિસ્તાન સામે રમાનાર ત્રીજી T20 આંતરરાષ્ટ્રીય મેચમાં રમી શકશે નહીં. તે અને તેની પત્ની લુઇસ ટૂંક સમયમાં તેમના ત્રીજા બાળકની અપેક્ષા રાખે છે.
ESPNCricinfoના એક અહેવાલ મુજબ, હજુ એ સ્પષ્ટ નથી કે ઇંગ્લિશ કેપ્ટન શ્રેણીની ચોથી અને છેલ્લી T20I માટે સમયસર ટીમમાં જોડાશે કે નહીં. ઈંગ્લેન્ડ અને પાકિસ્તાન વચ્ચે છેલ્લી મેચ 30 મેના રોજ ઓવલમાં રમાશે અને તેના બીજા જ દિવસે ઈંગ્લેન્ડની T20 વર્લ્ડ કપ ટીમ વેસ્ટ ઈન્ડિઝ જવા રવાના થશે.
જોકે, બટલર મેગા ઈવેન્ટ માટે ટીમ સાથે પ્રવાસ કરે તેવી અપેક્ષા છે. અગાઉ, 33 વર્ષીય બટલરે સ્પષ્ટપણે કહ્યું હતું કે તે વિશ્વ કપની પરવા કર્યા વિના ત્રીજા બાળકના જન્મ સમયે તેના પરિવાર સાથે રહેશે. આનાથી તે 4 જૂને સ્કોટલેન્ડ સામેની ઈંગ્લેન્ડની પ્રથમ ગ્રૂપ ગેમ ચૂકી જવાની શક્યતા વધી ગઈ હતી. પરંતુ હવે એવું લાગી રહ્યું છે કે કેપ્ટન બટલર પ્રથમ મેચથી જ ઉપલબ્ધ થશે. તેની ગેરહાજરીમાં મોઈન અલી ઈંગ્લેન્ડનું નેતૃત્વ કરશે.
પાકિસ્તાન સામેની ચાર મેચની શ્રેણીમાં ઈંગ્લેન્ડ 1-0થી આગળ છે, પ્રથમ મેચ વરસાદને કારણે ધોવાઈ ગયા બાદ યજમાન ટીમે બીજી T20 ઈન્ટરનેશનલ મેચ 23 રને જીતી લીધી હતી.