કોલકાતામાં ભારત અને વેસ્ટ ઈન્ડિઝ વચ્ચેની ત્રણ મેચની T20I શ્રેણી માટે બંગાળ સરકારે 75 ટકા દર્શકોને ઈડન ગાર્ડન્સ સ્ટેડિયમમાં પ્રવેશવાની મંજૂરી આપી છે. આ મેચો 16, 18 અને 20 ફેબ્રુઆરીએ યોજાશે. આ નિર્ણયને કારણે લગભગ 50,000 લોકો સ્ટેડિયમમાં બેસીને મેચની મજા માણી શકશે.
રાજ્ય સરકાર દ્વારા બહાર પાડવામાં આવેલા નોટિફિકેશનમાં કહેવામાં આવ્યું છે કે તમામ ઇન્ડોર અને આઉટડોર રમતોમાં 75 ટકા દર્શકોને મંજૂરી આપવામાં આવશે. આ સંખ્યા સ્ટેડિયમની ક્ષમતા અનુસાર હશે. ક્રિકેટ એસોસિએશન ઓફ બંગાળ (CAB) એ સરકારના આ નિર્ણયનું સ્વાગત કર્યું છે. અગાઉ ગયા વર્ષે નવેમ્બરમાં, ન્યુઝીલેન્ડ સાથે ટી20 શ્રેણીની ત્રીજી મેચ માટે, બંગાળ સરકારે 70 ટકા દર્શકોને ઈડન ગાર્ડન્સમાં પ્રવેશવાની મંજૂરી આપી હતી.
વેસ્ટ ઈન્ડિઝ સામે ત્રણ મેચની ટી-20 સીરીઝ રમતા પહેલા ભારતે એટલી જ વન-ડે સીરીઝ રમવાની છે. ODI શ્રેણીનું આયોજન અમદાવાદમાં કરવામાં આવી રહ્યું છે અને ત્રણેય મેચ નરેન્દ્ર મોદી સ્ટેડિયમમાં રમાશે. જો કે, ODI શ્રેણી દરમિયાન કોઈપણ દર્શકોને સ્ટેડિયમમાં પ્રવેશવા દેવામાં આવશે નહીં. આ ODI સિરીઝની પ્રથમ મેચ 6 ફેબ્રુઆરી, બીજી મેચ 9 ફેબ્રુઆરી અને ત્રીજી મેચ 11 ફેબ્રુઆરીએ રમાશે.
વેસ્ટ ઈન્ડિઝ સામેની ODI શ્રેણી પહેલા, ભારતીય ટીમ દક્ષિણ આફ્રિકાના પ્રવાસે હતી જ્યાં તે ODI શ્રેણી 0-3થી હારી ગઈ હતી અને Proteasને ODI શ્રેણીમાં પ્રથમ વખત ભારતનો સફાયો કરવાનું ગૌરવ પ્રાપ્ત થયું હતું. આ શ્રેણીમાં હાર બાદ ભારતીય ટીમ ફરી એકવાર એક્શનમાં ઉતરવા માટે તૈયાર દેખાઈ રહી છે.
રોહિતની કપ્તાનીમાં ટીમ ઈન્ડિયા વેસ્ટ ઈન્ડિઝ સામે બાઉન્સ બેક કરવાનો પ્રયાસ કરશે, જ્યારે કિરોન પોલાર્ડની કેપ્ટનશીપ હેઠળની વેસ્ટ ઈન્ડિઝની ટીમે ઈંગ્લેન્ડને 5 મેચની ટી20 શ્રેણીમાં 3-2થી હરાવ્યું છે અને ટીમનો ઉત્સાહ ઊંચો છે.