દિનેશ કાર્તિકની કેપ્ટન્સીમાં ભારતે બીજી વોર્મ-અપ મેચમાં નોર્થમ્પટનશાયરને 10 રને હરાવ્યું. આ પહેલા ભારતે પ્રથમ વોર્મ-અપ મેચમાં ડર્બીશાયરને 7 વિકેટે હરાવ્યું હતું.
દિનેશ કાર્તિકની કપ્તાનીમાં ભારતીય ટીમે બંને પ્રેક્ટિસ મેચોમાં બેક ટુ બેક જીત મેળવી હતી. બીજી મેચમાં નોર્થમ્પટનશાયરએ ટોસ જીતીને ભારતને બેટિંગ કરવાનું કહ્યું હતું. ભારતે 20 ઓવરમાં 8 વિકેટે 149 રન બનાવ્યા હતા. આ પછી 150 રનના લક્ષ્યાંકનો પીછો કરતા વિરોધી ટીમ 19.3 ઓવરમાં 139 રનમાં ઓલઆઉટ થઈ ગઈ અને ભારતનો વિજય થયો.
ભારતે પ્રથમ રમતા 149 રન બનાવ્યા હતા, પરંતુ ઓપનર બેટ્સમેન સંજુ સેમસન ઇનિંગના પહેલા જ બોલમાં ગોલ્ડન ડક પર આઉટ થયો હતો. આ પછી રાહુલ ત્રિપાઠીએ 7 રનમાં પોતાની વિકેટ ગુમાવી હતી જ્યારે સૂર્યકુમાર યાદવે નિરાશ કર્યો હતો અને તે પણ 3 બોલનો સામનો કરીને શૂન્ય રને આઉટ થયો હતો. ભારતે પોતાની પ્રથમ ત્રણ વિકેટ માત્ર 8 રનમાં ગુમાવી દીધી હતી. આ પછી ઈશાન કિશને પ્રયાસ કર્યો હતો, પરંતુ તે પણ 16 રન બનાવીને પેવેલિયન પરત ફર્યો હતો.
કેપ્ટન દિનેશ કાર્તિકે 26 બોલમાં એક છગ્ગા અને ત્રણ ચોગ્ગાની મદદથી 34 રન બનાવ્યા હતા જ્યારે વેંકટેશ અય્યરે 20 રન બનાવ્યા હતા. આ પછી હર્ષલ પટેલે પોતાની તાકાત બતાવી અને તેણે 36 બોલમાં 3 સિક્સ અને 5 ફોરની મદદથી 54 રન બનાવ્યા. અવેશ ખાન અને અર્શદીપ સિંહે પણ શૂન્યમાં પોતાની વિકેટ ગુમાવી હતી જ્યારે ચહલ બે રન બનાવીને અણનમ રહ્યો હતો. ભારતે ગુમાવેલી 8 વિકેટોમાંથી ચાર બેટ્સમેન શૂન્ય પર આઉટ થઈ ગયા હતા.
150 રનના ટાર્ગેટનો પીછો કરવા ઉતરેલી નોર્થમ્પટનશાયરની ટીમ ભારતીય બોલરોની સામે સંપૂર્ણ રીતે બરબાદ થઈ ગઈ હતી અને માત્ર 139 રન સુધી જ પહોંચી શકી હતી. આ ટીમ માટે સૈફ ઝબીએ 33 રનની સૌથી મોટી ઇનિંગ રમી હતી, જ્યારે અન્ય બેટ્સમેનોએ નિરાશ કર્યા હતા. ભારત તરફથી અર્શદીપ સિંહ, હર્ષલ પટેલ, અવેશ ખાન, ચહલે બે-બે જ્યારે પ્રસિધ્ધ કૃષ્ણા અને વેંકટેશ અય્યરે એક-એક વિકેટ લીધી હતી.