ICC T20 વર્લ્ડ કપ 2024માં પાકિસ્તાનની ટીમનું પ્રદર્શન ખૂબ જ નિરાશાજનક રહ્યું હતું. તેમની પ્રથમ મેચમાં, તેમને તુલનાત્મક રીતે નબળી યુએસએ ટીમ સામે સુપર ઓવરમાં શરમજનક હારનો સામનો કરવો પડ્યો હતો.
ટીમને આ ખરાબ પ્રદર્શનની કિંમત ચૂકવવી પડી અને તે ટૂર્નામેન્ટમાંથી બહાર થઈ ગઈ છે. આ દરમિયાન પાકિસ્તાન ક્રિકેટ બોર્ડે ખેલાડીઓ સામે કડક કાર્યવાહી કરવાનો નિર્ણય લીધો છે.
એવું કહેવામાં આવી રહ્યું છે કે પાકિસ્તાન ક્રિકેટ બોર્ડ તેની ટીમના પ્રદર્શનથી બિલકુલ ખુશ નથી અને તે ટૂંક સમયમાં કેન્દ્રીય કરારની સમીક્ષા કરી શકે છે અને ખેલાડીઓના પગારમાં ઘટાડો કરી શકે છે. ન્યૂઝ એજન્સી પીટીઆઈ જણાવ્યું હતું કે કેટલાક અધિકારીઓ અને ભૂતપૂર્વ ખેલાડીઓએ પીસીબીના અધ્યક્ષ મોહસિન નકવીને કેન્દ્રીય કરારની સમીક્ષા કરવાની સલાહ આપી છે.
પીટીઆઈના અનુસાર, ટીમમાં 3 જૂથો બની ગયા છે. બાબર આઝમ, મોહમ્મદ રિઝવાદ અને શાહીન આફ્રિદી પાછળ આખો કેમ્પ 3 ભાગમાં વહેંચાયેલો છે. આ સિવાય મોહમ્મદ આમિર અને ઈમાદ વસીમ જેવા સિનિયર ખેલાડીઓની વાપસીથી ટીમનું વાતાવરણ વધુ ખરાબ થઈ ગયું છે.
ઉલ્લેખનીય છે કે પાકિસ્તાની ટીમમાં તિરાડના સમાચાર ઘણા સમયથી સામે આવી રહ્યા હતા. કહેવામાં આવી રહ્યું છે કે T20 વર્લ્ડ કપ 2024 પહેલા રાષ્ટ્રીય પસંદગીકાર વહાબ રિયાઝે PCB અધ્યક્ષ મોહસિન નકવીને ટીમની સમસ્યાઓ વિશે જાણકારી આપી હતી.