શિમાવ માવીએ ડેબ્યૂ મેચમાં ઈતિહાસ રચ્યો, આવું કરનાર ત્રીજો ભારતીય

માત્ર સિલેક્ટેડ ખેલાડીઓનું જ ઇન્ટરનેશનલ ક્રિકેટમાં ડેબ્યૂનું ડ્રીમ હોય છે, જેને જોઈને કહી શકાય કે જો આ રીતે શરૂઆત થાય. હવે આ યાદીમાં 24 વર્ષીય ભારતીય ફાસ્ટ બોલર શિવમ માવીનું નામ પણ જોડાઈ ગયું છે.

માવીએ મંગળવારે શ્રીલંકા સામેની પ્રથમ ટી20થી આંતરરાષ્ટ્રીય કારકિર્દીની શરૂઆત કરી હતી. તેણે પ્રથમ મેચમાં ઘાતક બોલિંગ કરીને શ્રીલંકાની ટીમને પરસેવો પાડી દીધો હતો. તેણે 4 ઓવરમાં 22 રન આપીને 4 વિકેટ લઈને ઈતિહાસ રચ્યો હતો.

માવી બોલરોની એક વિશિષ્ટ ક્લબમાં જોડાયો છે. તે T20 ઇન્ટરનેશનલ ડેબ્યૂ મેચમાં ચાર વિકેટ લેનારો ત્રીજો ભારતીય બોલર બની ગયો છે. તેની પહેલા આ સિદ્ધિ બરિન્દર સરન અને પ્રજ્ઞાન ઓઝાએ કરી હતી. બરિન્દરે 20 જૂન 2016ના રોજ હરારેમાં ઝિમ્બાબ્વે વિરુદ્ધ આ કર્યું હતું. તેણે 10 રન ખર્ચીને ચાર શિકાર લીધા. પ્રજ્ઞાને 6 જૂન 2009ના રોજ બાંગ્લાદેશ સામે 21 રન આપીને ચાર વિકેટ લીધી હતી. આ મેચ નોટિંગહામમાં રમાઈ હતી.

ભારતે શ્રીલંકા સામે 163 રનનો ટાર્ગેટ આપ્યો હતો, જેમાં માવીએ બચાવ કરવામાં મહત્વની ભૂમિકા ભજવી હતી. તેણે તેની દરેક ઓવરમાં એક વિકેટ લીધી. માવીએ પ્રથમ ઓવરમાં પથુમ નિસાન્કાને (1) બોલ્ડ કર્યો હતો જ્યારે બીજી ઓવરમાં ધનંજય ડી’સિલ્વા (8)ને પેવેલિયનનો રસ્તો બતાવ્યો હતો. ડી’સિલ્વાએ સંજુ સેમસનને કેચ સોંપ્યો. માવીએ પોતાની ત્રીજી ઓવરમાં વનિન્દુ હસરંગા (21)ને હાર્દિક પંડ્યાના હાથે કેચ કરાવ્યો. તેણે ચોથી ઓવરમાં (1) મહિષ થીક્ષાનાને આઉટ કર્યો, જે સૂર્યકુમાર યાદવના હાથે કેચ આઉટ થયો. આ મેચમાં ભારતે બે રને રોમાંચક વિજય નોંધાવ્યો હતો.