ટીમ ઈન્ડિયાના સ્ટાર બેટ્સમેન સૂર્યકુમાર યાદવે રવિવારે ગુવાહાટીમાં દક્ષિણ આફ્રિકા વિરુદ્ધ બીજી T20 ઈન્ટરનેશનલ મેચમાં તોફાની અડધી સદી ફટકારીને વર્લ્ડ રેકોર્ડ બનાવ્યો છે.
સૂર્યાએ પ્રોટીઝ ટીમ સામે બીજી T20 ઈન્ટરનેશનલ મેચમાં માત્ર 22 બોલમાં પાંચ ચોગ્ગા અને છગ્ગાની મદદથી 61 રન બનાવ્યા હતા.
ભારતના મિસ્ટર 360 ડિગ્રી તરીકે જાણીતા સૂર્યકુમાર યાદવે આ સમયગાળા દરમિયાન સૌથી ઓછા બોલમાં 1000 T20 ઇન્ટરનેશનલ રન બનાવવાનો વર્લ્ડ રેકોર્ડ બનાવ્યો હતો. આ સિવાય સૂર્યાએ કેપ્ટન રોહિત શર્માને પણ પાછળ છોડી દીધો અને સૌથી ઝડપી 1000 T20 ઈન્ટરનેશનલ રન બનાવનાર ત્રીજો ભારતીય બેટ્સમેન બન્યો.
સૂર્યકુમાર યાદવે માત્ર 573 બોલમાં 1000 T20 ઈન્ટરનેશનલ રન પૂરા કર્યા. તે સૌથી ઓછા બોલમાં 1000 T20 ઈન્ટરનેશનલ રન પૂરા કરનાર ટોપ બેટ્સમેન બની ગયો છે. યાદવે ઓસ્ટ્રેલિયાના ઓલરાઉન્ડર ગ્લેન મેક્સવેલનો રેકોર્ડ તોડ્યો, જેણે 604 બોલમાં 1000 T02 ઈન્ટરનેશનલ રન પૂરા કર્યા. 635 બોલમાં 1000 રન પૂરા કરીને ન્યૂઝીલેન્ડનો કોલિન મેનરો આ યાદીમાં ત્રીજા સ્થાને છે. વેસ્ટ ઈન્ડિઝના એવિન લુઈસ (640 બોલ) અને શ્રીલંકાના ભૂતપૂર્વ ઓલરાઉન્ડર થિસારા પરેરા (654 બોલ) અનુક્રમે ચોથા અને પાંચમા સ્થાને છે.
જેમ જેમ સૂર્યકુમાર યાદવે તેનો 24મો રન પૂરો કર્યો, તેણે રોહિત શર્માનો રેકોર્ડ તોડ્યો અને સૌથી ટૂંકી ઇનિંગ્સમાં 1000 T20 આંતરરાષ્ટ્રીય રન પૂરા કરનાર ત્રીજો ભારતીય બેટ્સમેન બન્યો. ભૂતપૂર્વ ભારતીય કેપ્ટન વિરાટ કોહલીએ ભારત માટે સૌથી નાની ઈનિંગ્સમાં 1000 T20 ઈન્ટરનેશનલ રન પૂરા કરવાનો રેકોર્ડ બનાવ્યો છે. કોહલીએ 27મી ઇનિંગ્સમાં જ આ આંકડો પાર કર્યો હતો. આ યાદીમાં બીજા સ્થાન પર કેએલ રાહુલ છે, જેણે 31 ઇનિંગ્સમાં 1000 T20 આંતરરાષ્ટ્રીય રન પૂરા કર્યા છે.