T20 વર્લ્ડ કપ 2024 નું આયોજન વેસ્ટ ઈન્ડિઝ અને અમેરિકા દ્વારા કરવામાં આવશે. આ ટુર્નામેન્ટ 1 જૂનથી શરૂ થશે, જે 20 ટીમો વચ્ચે રમાશે. આ અત્યાર સુધીનો સૌથી મોટો T20 વર્લ્ડ કપ હશે. આ પહેલા ટી20 વર્લ્ડ કપમાં આટલી ટીમોએ એકસાથે ભાગ લીધો ન હતો. પરંતુ આ ટૂર્નામેન્ટ પર મોટો ખતરો તોળાઈ રહ્યો છે. ક્રિકબઝના એક રિપોર્ટ અનુસાર, ટૂર્નામેન્ટ દરમિયાન કેરેબિયન દેશોમાં આતંકવાદી હુમલાની ધમકીઓ મળી છે, જેના કારણે દરેકનું ટેન્શન વધી ગયું છે.
ઉત્તર પાકિસ્તાનમાં સ્થિત IS-ખોરાસાને વર્લ્ડ કપ દરમિયાન કેરેબિયન દેશોને નિશાન બનાવવાની ધમકી આપી છે. આતંકવાદી સંગઠન ઈસ્લામિક સ્ટેટે T20 વર્લ્ડ કપ સહિત વિશ્વભરની મોટી ઈવેન્ટ્સને નિશાન બનાવવાની ધમકી આપી છે. કેરેબિયન મીડિયામાં જણાવવામાં આવ્યું છે કે આઈએસના મીડિયા ગ્રુપ ‘નાશિર પાકિસ્તાન’ દ્વારા વર્લ્ડ કપ માટે સંભવિત ખતરાની ગુપ્ત માહિતી મળી હતી. ત્રિનિદાદ એક્સપ્રેસ અનુસાર, નશીર-એ-પાકિસ્તાન IS સાથે જોડાયેલી પ્રચાર ચેનલ છે.
આતંકવાદી હુમલાના ખતરાને જોતા કેરેબિયન દેશ ત્રિનિદાદ અને ટોબેગોએ સુરક્ષા એલર્ટ જાહેર કર્યું છે. પ્રો-ઇસ્લામિક સ્ટેટ (IS) મીડિયા સ્ત્રોતોએ રમતગમતની ઘટનાઓ સામે હિંસા ભડકાવવા માટે ઝુંબેશ શરૂ કરી છે, એમ અનેક સુરક્ષા ચેતવણીઓ જારી કરવામાં આવી છે.
ISની અફઘાનિસ્તાન-પાકિસ્તાન શાખાએ એક વીડિયો સંદેશ પણ જાહેર કર્યો છે, જેમાં ઘણા દેશોમાં રક્તપાત કરવા પર ભાર મૂકવામાં આવ્યો છે. આ સિવાય તેણે પોતાના સમર્થકોને અપીલ કરી છે કે તેઓ જે પણ દેશમાં રહેતા હોય તે હુમલાખોર જૂથમાં સામેલ થાય. જોકે, વેસ્ટ ઈન્ડિઝ ક્રિકેટ બોર્ડના સીઈઓ જોની ગ્રેવે ખાતરી આપી હતી કે કોઈપણ પ્રકારના જોખમને ઘટાડવા માટે તેમની પાસે મજબૂત સુરક્ષા યોજના છે.
T20 વર્લ્ડ કપની મેચો વેસ્ટ ઈન્ડિઝમાં, એન્ટિગુઆ અને બાર્બુડા, બાર્બાડોસ, ગયાના, સેન્ટ લુસિયા, સેન્ટ વિન્સેન્ટ એન્ડ ધ ગ્રેનેડાઈન્સ, ત્રિનિદાદ અને ટોબેગોમાં યોજાશે.