ભારતમાં યોજાયેલા 2026 T20 વર્લ્ડ કપમાં બાંગ્લાદેશની ગેરહાજરીને લઈને ફરી એકવાર ચર્ચા ગરમાઈ છે. બાંગ્લાદેશના કેપ્ટન લિટન દાસે સ્પષ્ટ શબ્દોમાં કહ્યું છે કે ટૂર્નામેન્ટમાં ભાગ ન લેવાનો નિર્ણય ખેલાડીઓની સહમતિથી લેવામાં આવ્યો નહોતો. તેના આ નિવેદનથી બાંગ્લાદેશ ક્રિકેટ બોર્ડ (BCB) અને સરકારના અગાઉના દાવાઓ પર સવાલો ઊભા થયા છે.
થોડા સમય પહેલાં બાંગ્લાદેશના પૂર્વ આંતરિમ રમત સલાહકાર આસિફ નઝરૂલે દાવો કર્યો હતો કે T20 વર્લ્ડ કપમાંથી દૂર રહેવાનો નિર્ણય બોર્ડ અને ખેલાડીઓએ મળીને લીધો હતો. જોકે લિટન દાસે આ દાવાને ફગાવી દીધો અને કહ્યું કે ખેલાડીઓને આ નિર્ણય પ્રક્રિયામાં સામેલ કરવામાં આવ્યા નહોતા. તેના જણાવ્યા અનુસાર ટીમને માત્ર નિર્ણયની જાણ કરવામાં આવી હતી.
લિટન દાસે સુરક્ષાને લઈને પણ ચોંકાવનારો ખુલાસો કર્યો. તેણે જણાવ્યું કે અગાઉ પાકિસ્તાન પ્રવાસ દરમિયાન ખેલાડીઓની સુરક્ષા માટે રૂમની બહાર હથિયારધારી સુરક્ષાકર્મીઓ તૈનાત રહેતા હતા, જેના કારણે ખેલાડીઓમાં અસ્વસ્થતા અને દબાણનો માહોલ સર્જાયો હતો. આ નિવેદનથી સુરક્ષા મુદ્દે ચાલી રહેલી ચર્ચાને વધુ વેગ મળ્યો છે.
ઉલ્લેખનીય છે કે બાંગ્લાદેશ ક્રિકેટ બોર્ડે શરૂઆતમાં ભારતમાં મેચ રમવા અંગે સુરક્ષા ચિંતાઓ વ્યક્ત કરી હતી અને ICC પાસે મેચો અન્ય દેશમાં ખસેડવાની માંગ પણ કરી હતી. બાદમાં ICCએ આ માંગ સ્વીકારી નહોતી અને અંતે બાંગ્લાદેશ ટૂર્નામેન્ટમાંથી બહાર રહ્યું હતું. ત્યારબાદ તેની જગ્યાએ સ્કોટલેન્ડને તક આપવામાં આવી હતી.
લિટન દાસના તાજા નિવેદન બાદ સ્પષ્ટ થયું છે કે બાંગ્લાદેશના ખેલાડીઓ અને પ્રશાસન વચ્ચે આ મુદ્દે એકમતતા નહોતી. હવે આ સમગ્ર વિવાદમાં આગળ શું ખુલાસા થાય છે તેના પર ક્રિકેટ જગતની નજર રહેશે.