વિઝા સમસ્યા સમાપ્ત, ભારત અને વેસ્ટ ઈન્ડિઝ વચ્ચે છેલ્લી બે મેચ ફ્લોરિડામાં

ભારત અને વેસ્ટ ઈન્ડિઝ વચ્ચેની પાંચ મેચની T20 ઈન્ટરનેશનલ સીરીઝની પ્રથમ ત્રણ મેચ કેરેબિયન ધરતી પર રમાઈ હતી, જ્યારે બાકીની બે મેચો હવે ફ્લોરિડામાં, યુએસએમાં રમવાની છે. બાકીની બે મેચ અનુક્રમે 6 અને 7 ઓગસ્ટના રોજ રમાવાની છે.

બંને ટીમના કેટલાક ખેલાડીઓ ફ્લોરિડા પહોંચી ગયા છે અને અન્ય પણ ટૂંક સમયમાં પહોંચી જશે. વાસ્તવમાં, અગાઉ એવા અહેવાલો આવ્યા હતા કે વિઝા સમસ્યાઓના કારણે, બાકીની બંને મેચો પણ કેરેબિયન ધરતી પર યોજવી પડશે.

ટાઈમ્સ ઓફ ઈન્ડિયાના સમાચાર અનુસાર, એક સૂત્રએ કહ્યું, “જે ખેલાડીઓ પાસે પહેલાથી જ યુએસ વિઝા છે તેઓ મિયામીમાં છે અને બાકીના લોકો તેમના વિઝા દસ્તાવેજોની પ્રક્રિયા કરાવવા માટે જ્યોર્જટાઉન, ગયાનામાં યુએસ એમ્બેસીમાં ગયા છે. તેમને પણ ટૂંક સમયમાં યુએસ વિઝા મળી જશે.

જ્યોર્જટાઉનથી મિયામીની ફ્લાઇટ પાંચ કલાકની છે. વેસ્ટ ઈન્ડિઝની ટીમ અને ટીમ ઈન્ડિયાના કેટલાક સભ્યો ફ્લોરિડા પહોંચી ગયા છે. ભારત હાલમાં શ્રેણીમાં 2-1થી આગળ છે. ભારતે પ્રથમ મેચમાં જીત મેળવી હતી જ્યારે બીજી મેચમાં વેસ્ટ ઈન્ડિઝે પુનરાગમન કર્યું હતું. ભારતે ત્રીજી મેચ જીતીને શ્રેણીમાં 2-1ની લીડ મેળવી લીધી છે.