જીત બાદ આફ્રિકાની ટીમને મોટો ઝટકો, આ ખેલાડી બીજી ટેસ્ટમાં નહીં રમે

સાઉથ આફ્રિકાએ ભારત સામેની 2 મેચની ટેસ્ટ શ્રેણીની શરૂઆત જીત સાથે કરી હતી અને 1-0ની મહત્વપૂર્ણ લીડ મેળવી હતી. આફ્રિકન ટીમે સેન્ચુરિયન મેદાન પર રમાયેલી પ્રથમ ટેસ્ટ મેચ માત્ર ત્રણ દિવસમાં જ જીતી લીધી હતી.

આ જીતમાં સાઉથ આફ્રિકાના ફાસ્ટ બોલરોએ મહત્વની ભૂમિકા ભજવી હતી, તો બેટિંગમાં ડીન એલ્ગર અદ્ભુત હતો, જેણે 185 રનની મહત્વપૂર્ણ ઈનિંગ રમી હતી અને ટીમને પ્રથમ દાવમાં 163 રનની જંગી લીડ અપાવવામાં મહત્વની ભૂમિકા ભજવી હતી. આ મેચમાં જીત છતાં, દક્ષિણ આફ્રિકાની ટીમ માટે એક ખરાબ સમાચાર સામે આવ્યા છે જેમાં કેપ્ટન ટેમ્બા બાવુમા હેમસ્ટ્રિંગની ઈજાને કારણે કેપટાઉનમાં રમાનારી બીજી ટેસ્ટ મેચમાં રમી શકશે નહીં.

ભારત સામેની સેન્ચુરિયન ટેસ્ટ મેચના પહેલા દિવસે ફિલ્ડિંગ કરતી વખતે ટેમ્બા બાવુમાને તેના હેમસ્ટ્રિંગમાં ઈજા થઈ હતી, ત્યારબાદ તેણે મેચમાં વધુ ભાગ લીધો ન હતો. ESPN ક્રિકઇન્ફોના રિપોર્ટ અનુસાર, હવે તે કેપટાઉન ટેસ્ટમાં પણ રમતા જોવા મળશે નહીં, જેના ટેસ્ટ કરિયરની છેલ્લી સિરીઝ રમી રહેલા ડીન એલ્ગરને ટીમની કેપ્ટનશિપની જવાબદારી સોંપવામાં આવી છે. એલ્ગર અગાઉ ટેસ્ટ ફોર્મેટમાં દક્ષિણ આફ્રિકાની ટીમની કેપ્ટનશિપની જવાબદારી પણ નિભાવી ચૂક્યો છે. એલ્ગરના નેતૃત્વમાં દક્ષિણ આફ્રિકાની ટીમે 17 મેચ રમી હતી જેમાંથી તે 9 મેચ જીતવામાં સફળ રહી હતી, જ્યારે 7માં ટીમને હારનો સામનો કરવો પડ્યો હતો જ્યારે એક મેચ ડ્રોમાં સમાપ્ત થઈ હતી.

સેન્ચુરિયન ટેસ્ટમાં એકતરફી જીત હાંસલ કર્યા બાદ દક્ષિણ આફ્રિકાની ટીમ હવે કેપટાઉન ટેસ્ટમાં પણ જીત મેળવવાનો પ્રયાસ કરશે જેથી તે આ શ્રેણીમાં ક્લીન સ્વીપ કરી શકે. બાવુમાના બહાર નીકળ્યા પછી, બોલિંગ ઓલરાઉન્ડર વિયાન મુલ્ડરને તેના સ્થાને બીજી ટેસ્ટ મેચની પ્લેઈંગ ઈલેવનમાં સામેલ કરી શકાય છે, જે ઝડપી બોલિંગનો વિકલ્પ પણ પ્રદાન કરે છે.