12 વર્ષ પછી ટેસ્ટ ટીમમાં તક મળતા જયદેવ ઉનડકટે કહી આ મોટી વાત

લેફ્ટ આર્મ ફાસ્ટ બોલર જયદેવ ઉનડકટની મહેનત આખરે 12 વર્ષ બાદ રંગ લાવી. BCCIએ રવિવારે સાંજે જયદેવ ઉનડકટના બાંગ્લાદેશ સામે 14 ડિસેમ્બરથી શરૂ થનારી બે મેચની ટેસ્ટ શ્રેણી માટે ટેસ્ટ ટીમમાં સમાવેશ કરવાની જાહેરાત કરી હતી.

મોહમ્મદ શમી અને રવીન્દ્ર જાડેજા ઈજામાંથી બહાર ન આવ્યા બાદ ટેસ્ટ ટીમમાં ફેરફાર કરતી વખતે પસંદગી સમિતિએ આ નિર્ણય લીધો હતો. જોકે, મોહમ્મદ શમીની જગ્યાએ નવદીપ સૈની અને જાડેજાની જગ્યાએ સૌરભ કુમારનો સમાવેશ કરવામાં આવ્યો હતો. આ સાથે ચેતન શર્માની અધ્યક્ષતાવાળી પસંદગી સમિતિએ અનુભવી જયદેવ ઉનડકટને ટીમમાં સામેલ કરવાની જાહેરાત કરી હતી.

જયદેવ ઉનડકટ છેલ્લાં કેટલાંક સિઝનથી સૌરાષ્ટ્રની કેપ્ટનશીપ કરીને સ્થાનિક સર્કિટમાં ધમાલ મચાવી રહ્યો છે. પોતાની કેપ્ટનશીપ હેઠળ શાનદાર બોલિંગ કરીને તેણે સૌરાષ્ટ્રને પ્રથમ રણજી ચેમ્પિયન બનાવ્યું. હવે તાજેતરમાં વિજય હજારે ટ્રોફીમાં સૌરાષ્ટ્ર માટે ખિતાબ જીત્યો હતો. જો કે તેના પ્રદર્શનની સતત અવગણના કરવામાં આવી રહી હતી, પરંતુ તેણે ટીમ ઈન્ડિયામાં વાપસી કરવામાં કોઈ કસર છોડી ન હતી.

આવી સ્થિતિમાં 12 વર્ષના લાંબા અંતર બાદ ટીમ ઈન્ડિયાના દરવાજા તેના માટે ખુલ્યા છે. તેણે પોતાના શાનદાર પ્રદર્શનના દમ પર પસંદગીકારોને ટીમમાં સામેલ કરવા મજબૂર કર્યા. ટીમમાં પોતાના સમાવેશની જાહેરાત બાદ ઉનડકટે ટ્વિટર પર પોતાના દિલની સ્થિતિ વ્યક્ત કરી હતી.

ઉનડકટે ટ્વીટ કરીને કહ્યું, આ ક્ષણ વાસ્તવિક લાગે છે! આ તે લોકો માટે છે જેમણે હંમેશા મારામાં વિશ્વાસ કર્યો અને મને ટેકો આપ્યો. હું તેમનો આભારી છું.