યજમાન ઓસ્ટ્રેલિયા અને ઈંગ્લેન્ડ વચ્ચે 8 ડિસેમ્બરથી પાંચ મેચની એશિઝ સિરીઝ શરૂ થવા જઈ રહી છે, પરંતુ તે પહેલા આ સિરીઝ સાથે જોડાયેલા એક મોટા સમાચાર સામે આવ્યા છે.
એશિઝ શ્રેણી પહેલા, ક્રિકેટ ઓસ્ટ્રેલિયા (સીએ) એ સોમવારે પુષ્ટિ કરી છે કે ઇંગ્લેન્ડ સામે આગામી એશિઝ શ્રેણીની પાંચમી ટેસ્ટ પર્થમાં રમાશે નહીં. આ મેચ હાલ પુરતી રદ કરવામાં આવી છે.
હકીકતમાં, ક્રિકેટ ઓસ્ટ્રેલિયાએ કહ્યું કે બાયો-બબલ (કોરોના સામે રક્ષણ માટે બનાવવામાં આવેલ સલામત વાતાવરણ)ની જરૂરિયાતને પહોંચી વળવામાં મુશ્કેલીને ધ્યાનમાં રાખીને આ નિર્ણય લેવામાં આવ્યો છે. વેસ્ટર્ન ઓસ્ટ્રેલિયા (WA) રાજ્યના નિયમો અનુસાર, ત્યાં પહોંચ્યા પછી ખેલાડીઓ માટે ક્વોરેન્ટાઇન જરૂરી છે. તેનાથી બચવા માટે ક્રિકેટ ઓસ્ટ્રેલિયાએ આ મેચ રદ્દ કરવાની યોજના બનાવી છે.
ક્રિકેટ ઓસ્ટ્રેલિયાએ પણ પુષ્ટિ કરી છે કે હજુ સુધી મેચ માટે વૈકલ્પિક સ્થળની પસંદગી કરવામાં આવી નથી, પરંતુ તાસ્માનિયામાં હોબાર્ટ તેની આગેવાની કરી રહ્યું છે. ક્વીન્સલેન્ડ, વિક્ટોરિયા અને ન્યૂ સાઉથ વેલ્સ રાજ્યો તેમજ ઓસ્ટ્રેલિયાના નેશનલ કેપિટલ ટેરિટરીએ આ મેચની યજમાનીમાં રસ દર્શાવ્યો છે. સીએના ચીફ એક્ઝિક્યુટિવ નિક હોકલીએ જણાવ્યું હતું કે, “પર્થ સ્ટેડિયમમાં મેન્સ એશિઝની પાંચમી ટેસ્ટનું આયોજન કરવામાં અસમર્થ રહેવાથી અમે ખૂબ નિરાશ છીએ.”
કોરોનાના નવા પ્રકારના દેખાવથી, પશ્ચિમ ઓસ્ટ્રેલિયાએ સ્પષ્ટ કર્યું હતું કે જો તે પર્થમાં પ્રવેશવા માંગે છે, તો ક્વોરેન્ટાઇનના નિયમોનું પાલન કરવું પડશે. માત્ર ખેલાડીઓ જ નહીં પરંતુ બ્રોડકાસ્ટિંગ ટીમથી લઈને સપોર્ટ સ્ટાફના સભ્યોને પણ ક્વોરેન્ટાઈનમાં રહેવું પડશે. આ શક્ય નહોતું કારણ કે ચોથી અને છેલ્લી મેચમાં માત્ર થોડા દિવસનું અંતર છે. જેના કારણે આ મેચ રદ કરવામાં આવી છે.