અશ્વિન અને શ્રેયસ અય્યરે માર્યો ICC ટેસ્ટ રેન્કિંગમાં છલાંગ, જાડેજા સર્વશ્રેષ્ઠ

ભારતીય ટીમના સ્પિનર ​​રવિચંદ્રન અશ્વિન અને બેટ્સમેન શ્રેયસ અય્યરને ICC મેન્સ ટેસ્ટ પ્લેયર રેન્કિંગમાં ફાયદો થયો છે. ICC વર્લ્ડ ટેસ્ટ ચેમ્પિયનશિપ હેઠળ બાંગ્લાદેશ અને ભારત વચ્ચે રમાયેલી બે મેચની ટેસ્ટ શ્રેણી બાદ ICC એ ટેસ્ટ રેન્કિંગ જાહેર કર્યું છે.

આર અશ્વિન હવે વિશ્વના ટોપ 5 બોલરોમાં સામેલ થઈ ગયો છે, જ્યારે અય્યર ટોપ 20માં પહોંચી ગયો છે.

મીરપુર ટેસ્ટ મેચમાં છ વિકેટ લીધા બાદ આર અશ્વિન એક ક્રમ ઉપર ગયો છે અને જસપ્રીત બુમરાહ સાથે બોલરોમાં સંયુક્ત ચોથા ક્રમે છે. તેણે બીજી ઈનિંગમાં અણનમ 42 રનની મહત્વની ઈનિંગ રમી, જેના કારણે તે 3 સ્થાનની છલાંગ લગાવીને 84માં સ્થાને પહોંચી ગયો છે. તેની ઇનિંગથી ભારતને 3 વિકેટે જીત અપાવી અને ભારતે WTCમાં સારી પકડ જમાવી લીધી.

અશ્વિન સાથે અતૂટ 71 રનની ભાગીદારી કરીને ટીમને જીત અપાવનાર શ્રેયસ અય્યરે કારકિર્દીનું સર્વશ્રેષ્ઠ 16મું સ્થાન હાંસલ કર્યું છે. અય્યરના 87 અને અણનમ 29 રનના સ્કોરથી તેને 26માં સ્થાનેથી આગળ વધવામાં મદદ મળી છે, જે રેન્કિંગમાં તેનો અગાઉનો સર્વશ્રેષ્ઠ હતો. તે જ સમયે, ઋષભ પંત પ્રથમ દાવમાં 93 રન બનાવ્યા અને 3 રેટિંગ પોઈન્ટ મેળવ્યા બાદ છઠ્ઠા સ્થાને રહ્યો. તે ટોચના ક્રમાંકિત ભારતીય બેટ્સમેન છે.

હાલમાં ટેસ્ટ ક્રિકેટમાં નંબર વન બેટ્સમેન ઓસ્ટ્રેલિયાનો માર્નસ લાબુશેન છે જ્યારે નંબર વન બોલર ટેસ્ટ ક્રિકેટમાં ઓસ્ટ્રેલિયન ટીમનો કેપ્ટન પેટ કમિન્સ છે. બીજી તરફ ઓલરાઉન્ડરોની વાત કરીએ તો રવિન્દ્ર જાડેજા હાલમાં વિશ્વનો સર્વશ્રેષ્ઠ ઓલરાઉન્ડર છે. રવિચંદ્રન અશ્વિન અત્યારે ઓલરાઉન્ડરોની રેન્કિંગમાં બીજા સ્થાને બેઠો છે.