એશ્ટન અગર અને મેટ રેનશોને દક્ષિણ આફ્રિકા સામે ચાલી રહેલી ત્રણ મેચોની ટેસ્ટ શ્રેણીની છેલ્લી મેચ માટે ઓસ્ટ્રેલિયન ટીમમાં સામેલ કરવામાં આવ્યા છે. યજમાનોએ મેલબોર્નમાં રમાયેલી બીજી ટેસ્ટ એક દાવ અને 182 રનથી જીતીને શ્રેણીમાં 2-0ની અજેય સરસાઈ મેળવી હતી, પરંતુ મેચ દરમિયાન તેમના બે ખેલાડીઓ ઈજાગ્રસ્ત થયા હતા.
મિશેલ સ્ટાર્કને આંગળીમાં ઈજા થઈ હતી, જ્યારે કેમેરોન ગ્રીનને તેની જમણી આંગળીમાં નાનું ફ્રેક્ચર થયું હતું જેના માટે તે સર્જરી કરાવશે. સિરીઝની ત્રીજી અને છેલ્લી મેચ 4 જાન્યુઆરીથી સિડનીમાં રમાવાની છે. આ મેચમાં કાંગારૂઓની નજર મુલાકાતી ટીમની ધૂળ સાફ કરવા પર હશે, જ્યારે દક્ષિણ આફ્રિકાની ટીમ ઈજ્જત બચાવવાના ઈરાદા સાથે મેદાનમાં ઉતરશે.
એશ્ટન અગરની પસંદગી ભારત સામે આગામી ચાર મેચની ટેસ્ટ શ્રેણીને ધ્યાનમાં રાખીને કરવામાં આવી છે. અગર ભારતના પ્રવાસમાં નાથન લિયોનના પાર્ટનર તરીકે રમી શકે છે. અગરે અત્યાર સુધી ચાર ટેસ્ટ રમી છે, જેમાં તેણે છેલ્લી મેચ 2018માં ચટ્ટોગ્રામમાં રમી હતી. આ વર્ષની શરૂઆતમાં ઈજાના કારણે સ્વેપ્સનને શ્રીલંકાના પ્રવાસમાં તેના સ્થાને તક મળી હતી.
એશ્ટન અગર ઓસ્ટ્રેલિયન પ્લેઈંગ ઈલેવનમાં કેમરોન ગ્રીનનું સ્થાન લઈ શકે છે, તે બોલિંગની સાથે સાતમા નંબર પર બેટિંગમાં પણ યોગદાન આપી શકે છે. ઓસ્ટ્રેલિયાના મુખ્ય કોચ એન્ડ્રુ મેકડોનાલ્ડે સૂચવ્યું છે કે આગામી સપ્તાહના અંતે SCG પિચ ખૂબ સૂકી રહેવાની સંભાવના હોવાથી, ટીમ ચોક્કસપણે અગરને તક આપવા માંગશે.
સ્ટાર્કના સ્થાને જોશ હેઝલવુડની ટીમમાં વાપસી થવાની અપેક્ષા હોવાથી ટીમ રેનશોના રૂપમાં વધારાના બેટ્સમેન સાથે મેદાનમાં ઉતરી શકે છે. 11 ટેસ્ટ રમી ચૂકેલા રેનશોએ તેની છેલ્લી મેચ 2018માં રમી હતી. તેણે તાજેતરમાં ન્યૂ સાઉથ વેલ્સ સામે અણનમ બેવડી સદી ફટકારી હતી.
SQUAD UPDATE: Matthew Renshaw and Ashton Agar have been added to the squad for the third NRMA Insurance Test match against South Africa in Sydney, in replacement of the injured Mitchell Starc and Cameron Green pic.twitter.com/EaReG3jQT2
— Cricket Australia (@CricketAus) December 30, 2022
દક્ષિણ આફ્રિકા સામેની સિડની ટેસ્ટ માટે ઓસ્ટ્રેલિયાની ટીમઃ પેટ કમિન્સ (સી), એશ્ટન અગર, સ્કોટ બોલેન્ડ, એલેક્સ કેરી, માર્કસ હેરિસ, જોશ હેઝલવુડ, ટ્રેવિસ હેડ, ઉસ્માન ખ્વાજા, માર્નસ લાબુશેન, લાન્સ મોરિસ, નાથન લિયોન, મેથ્યુ રેનશો સ્ટીવ સ્મિથ, ડેવિડ વોર્નર