કરાચીમાં ઓસ્ટ્રેલિયા સામેની બીજી ટેસ્ટમાં પાકિસ્તાનના કેપ્ટન બાબર આઝમે શાનદાર બેટિંગ કરી હતી. તેણે મેચની ચોથી ઇનિંગમાં પોતાની ટેસ્ટ કારકિર્દીનો સર્વોચ્ચ સ્કોર બનાવ્યો હતો.
જો કે તે તેની પ્રથમ બેવડી સદી ચૂકી ગયો હતો, પરંતુ તેણે 196 રનની ઇનિંગ રમીને ઘણી વિશેષ સિદ્ધિઓ મેળવી હતી.
ઓસ્ટ્રેલિયાના 506 રનના ટાર્ગેટનો પીછો કરતા બાબરે પાકિસ્તાન ટીમ માટે મેરેથોન ઇનિંગ રમતા 425 બોલનો સામનો કર્યો હતો, જે દરમિયાન તેણે 21 ફોર અને 1 સિક્સર ફટકારી હતી. તે ટેસ્ટની ચોથી ઇનિંગમાં સૌથી મોટી ઇનિંગ રમનાર કેપ્ટન બન્યો. આ મામલામાં તેણે ડોન બ્રેડમેન (173*), વિરાટ કોહલી (156) અને રિકી પોન્ટિંગ (141)ને પાછળ છોડી દીધા છે.
બાબરે પાંચમા દિવસે બેટિંગ કરીને છઠ્ઠી સદી પૂરી કરી અને આ દરમિયાન તેણે પૂર્વ પાકિસ્તાની ક્રિકેટર યુનિસ ખાન (171*)ને પાછળ છોડી દીધો. તે પાકિસ્તાન માટે ચોથી ઇનિંગમાં સૌથી મોટી ઇનિંગ રમનાર ક્રિકેટર બન્યો હતો.
આ સિવાય જમણા હાથના સ્ટાર બેટ્સમેને વધુ એક રેકોર્ડ પોતાના નામે કર્યો. તે ટેસ્ટની ચોથી ઇનિંગમાં 400 થી વધુ બોલ રમનાર પ્રથમ પાકિસ્તાની ક્રિકેટર બન્યો.
બાબરે તેની રેકોર્ડબ્રેક ઇનિંગ્સ દરમિયાન પ્રથમ અબ્દુલ્લા શફીક સાથે ત્રીજી વિકેટ માટે 228 રન અને મોહમ્મદ રિઝવાન સાથે પાંચમી વિકેટ માટે 115 રનની ભાગીદારી નોંધાવી હતી.