આ છે વિશ્વનો એકમાત્ર ખેલાડી જેણે એક જ ટેસ્ટમાં સદી અને હેટ્રિક લીધી

જ્યારે કોઈ બોલર સતત ત્રણ બોલમાં 3 વિકેટ લે છે તો તે હેટ્રિક છે અને હેટ્રિક લેવી એ કોઈપણ ખેલાડી માટે ગર્વની વાત છે. બેટ્સમેનની ઈચ્છા સદી ફટકારવાની અને બને તેટલા વધુ રન બનાવવાની હોય છે.

પરંતુ શું તમે કલ્પના કરી શકો છો કે એક જ મેચમાં કોઈ ક્રિકેટર હેટ્રિક લઈ શકે અને સદી પણ ફટકારી શકે? આ સાંભળીને તમે પણ ચોંકી જશો. પરંતુ દુનિયામાં એક એવો ક્રિકેટર છે જેણે આ કારનામું કર્યું છે.

તે ક્રિકેટર છે બાંગ્લાદેશ ક્રિકેટ ટીમના દિગ્ગજ સોહાગ ગાઝી, જેનો જન્મ 5 ઓગસ્ટ 1991ના રોજ થયો હતો. સોહાગ ગાઝીએ 2012માં વેસ્ટ ઈન્ડિઝ સામે ટેસ્ટ ક્રિકેટમાં ડેબ્યૂ કર્યું હતું અને તેણે પોતાની ડેબ્યૂ ટેસ્ટ મેચની બીજી ઈનિંગમાં 6 વિકેટ ઝડપી હતી. પરંતુ 2013માં તેણે ન્યૂઝીલેન્ડ સામેની ટેસ્ટ મેચમાં એટલું શાનદાર પ્રદર્શન કર્યું કે તેણે ઈતિહાસ રચી દીધો.

સોહાગ ગાઝીએ ઓક્ટોબર 2013માં ન્યૂઝીલેન્ડ સામે રમાયેલી મેચમાં 101 રનની અણનમ ઇનિંગ રમી હતી. આ મેચમાં ન્યૂઝીલેન્ડે આપેલા 469 રનના લક્ષ્યાંકના જવાબમાં બાંગ્લાદેશે પ્રથમ દાવમાં 501 રન બનાવ્યા હતા. આ પછી જ્યારે સોહાગ ગાઝી બોલિંગ કરવા માટે આવ્યો ત્યારે તેણે ન્યૂઝીલેન્ડના કોરી એન્ડરસન, બીજે વોટલિંગ અને ડગ બ્રેસવેલને આઉટ કરીને પોતાની હેટ્રિક પૂરી કરી. આ સાથે, તે ટેસ્ટ ક્રિકેટના ઇતિહાસમાં એક જ મેચમાં સદી ફટકારનાર અને હેટ્રિક લેનાર એકમાત્ર ક્રિકેટર બન્યો. કોઈ પણ ક્રિકેટર આ સિદ્ધિનું પુનરાવર્તન કરી શક્યો નથી.