ICC: ઇંગ્લેન્ડના યુવા બેટ્સમેનના હાથે જો રૂટ ગુમાવ્યો નંબર-1નો તાજ

ઇન્ટરનેશનલ ક્રિકેટ કાઉન્સિલ એટલે કે ICC એ તેની સાપ્તાહિક રેન્કિંગ જાહેર કરી છે. ICC દ્વારા તાજેતરની રેન્કિંગમાં મોટો ફેરફાર કરવામાં આવ્યો છે. વાસ્તવમાં, ઇંગ્લેન્ડના દિગ્ગજ બેટ્સમેન જો રૂટે તેની નંબર-1 ટેસ્ટ બેટિંગની સ્થિતિ ગુમાવી દીધી છે.

જો રૂટની ખુરશી તેના દેશબંધુ યુવા સ્ટાર બેટ્સમેન હેરી બ્રુકે છીનવી લીધી છે. હેરી બ્રુક હવે વિશ્વનો નંબર-1 ટેસ્ટ બેટ્સમેન બની ગયો છે. હેરી બ્રુકને તેના અદ્દભૂત પ્રદર્શન બાદ આ એવોર્ડ મળ્યો છે.

ઈંગ્લેન્ડનો યુવા સ્ટાર બેટ્સમેન હેરી બ્રુક હવે ટેસ્ટ ફોર્મેટમાં નંબર-1 બેટ્સમેન બની ગયો છે. બ્રુક છેલ્લા કેટલાક સમયથી શાનદાર ફોર્મમાં છે. બ્રુકે હાલમાં જ ન્યૂઝીલેન્ડ સામે ચાલી રહેલી ટેસ્ટ શ્રેણીની પ્રથમ બે મેચમાં સતત સદી ફટકારી છે. છેલ્લી ત્રણ ટેસ્ટ ઇનિંગ્સમાં, બ્રુકે દરેક વખતે 50+ રન બનાવ્યા છે. જેમાં તેણે 2 સદી અને 1 અડધી સદી ફટકારી છે.

બ્રુક નંબર-1 બન્યા બાદ હવે જો રૂટ બીજા નંબર પર સરકી ગયો છે. રૂટ અને બ્રુક વચ્ચે માત્ર 1 રેટિંગ પોઈન્ટનો તફાવત છે. આવી સ્થિતિમાં બંને બેટ્સમેન વચ્ચે આગામી મેચ દરમિયાન નંબર-1 બનવાની લડાઈ ચાલુ રહેશે.

જો આપણે ટેસ્ટ બેટિંગ રેન્કિંગમાં ભારતીય ખેલાડીઓ પર નજર કરીએ તો ટોપ-10માં માત્ર બે ભારતીય ખેલાડીઓ જ છે. આમાં યુવા ઓપનિંગ બેટ્સમેન યશસ્વી જયસ્વાલ ચોથા સ્થાને છે. જયસ્વાલના 811 રેટિંગ પોઈન્ટ છે. જયસ્વાલ સિવાય સ્ટાર વિકેટકીપર બેટ્સમેન ઋષભ પંત અન્ય ખેલાડી છે જેણે ટોપ-10 ટેસ્ટ બેટિંગ રેન્કિંગમાં પોતાનું સ્થાન જાળવી રાખ્યું છે.

જોકે, આ વખતે પંતને રેન્કિંગમાં મોટું નુકસાન થયું છે અને તે છઠ્ઠા સ્થાનેથી સરકીને નવમા સ્થાને પહોંચી ગયો છે. પંતના 724 રેટિંગ પોઈન્ટ છે. જો પંત અને જયસ્વાલ પોતાની રેન્કિંગમાં વધુ સુધારો કરવા ઈચ્છે છે તો તેમને ઓસ્ટ્રેલિયા સામેની આગામી ટેસ્ટ મેચમાં બેટથી અજાયબીઓ કરવા પડશે.