ભારત A બોલ ટેમ્પરિંગનો આરોપી, ઈશાન અને અમ્પાયર થયા આમને-સામને

ઓસ્ટ્રેલિયા પ્રવાસ પર ભારત A ટીમ પર બોલ ટેમ્પરિંગનો આરોપ લાગ્યો છે, જે બાદ ટીમના ખેલાડીઓ અને અમ્પાયર શોન ક્રેગ વચ્ચે ઉગ્ર બોલાચાલી થઈ હતી. આરોપો અનુસાર, ભારતીય ખેલાડીઓ દ્વારા બોલ સાથે છેડછાડ કરવામાં આવી હતી, જેના કારણે ચોથા દિવસે રમતમાં વિલંબ થયો હતો. આ ઘટનામાં ટીમના વિકેટકીપર ઈશાન કિશનનો વિરોધ ખુલ્લેઆમ સામે આવ્યો હતો અને તેણે અમ્પાયર સાથે ઉગ્ર બોલાચાલી પણ કરી હતી.

ઓસ્ટ્રેલિયા A સામેની પ્રથમ બિનસત્તાવાર ટેસ્ટ દરમિયાન આ બાબત પ્રકાશમાં આવી હતી. અમ્પાયર ક્રેગે બોલ પર સ્ક્રેચના નિશાન જોયા અને તેને બદલવાનો આદેશ આપ્યો, જેનાથી ભારતીય ખેલાડીઓ અસંમત હતા. આ નિર્ણયને લઈને કિશન તરફથી આકરી પ્રતિક્રિયા આવી હતી, જેના કારણે મામલો વધુ વકર્યો હતો.

રવિવારે મેકેમાં રમાઈ રહેલી મેચના ચોથા દિવસે, અમ્પાયર શોન ક્રેગે સ્પષ્ટ સ્ક્રેચના નિશાન જોઈને બોલ બદલવાનો નિર્ણય કર્યો અને તેણે ભારતીય ખેલાડીઓ પર બોલ ટેમ્પરિંગનો આરોપ મૂક્યો. ભારતીય ટીમ આ નિર્ણયથી નારાજ હતી અને તેઓએ અમ્પાયર સાથે આ અંગે દલીલ કરી હતી.

ઈશાન કિશને બોલ બદલવાના નિર્ણય પર નારાજગી વ્યક્ત કરી હતી અને તેને મૂર્ખ નિર્ણય ગણાવ્યો હતો. આના પર અમ્પાયરે તરત જ જવાબ આપ્યો અને કિશનને ચેતવણી આપી કે તેને અસંમતિ માટે જાણ કરવામાં આવશે. તેમની ટિપ્પણી સ્ટમ્પ માઈક પર રેકોર્ડ કરવામાં આવી હતી.

જો તે સાબિત થાય છે કે ભારત A ના ખેલાડીઓએ જાણીજોઈને બોલની સ્થિતિમાં ફેરફાર કર્યો છે, તો ક્રિકેટ ઓસ્ટ્રેલિયાની આચાર સંહિતા હેઠળ તેમની સામે પ્રતિબંધ સહિત કોઈપણ શિક્ષાત્મક પગલાં લેવામાં આવી શકે છે. આ આચાર સંહિતા સ્પષ્ટપણે જણાવે છે કે બોલની સ્થિતિમાં ફેરફાર, જે નિયમ 41.3.2 હેઠળ માન્ય નથી, તે અયોગ્ય ગણવામાં આવશે.