વેસ્ટ ઈન્ડિઝમાં ચાલ્યો ‘હિટમેન’નો જાદુ, સ્મિથના આ રેકોર્ડની બરાબરી કરી

ભારત અને વેસ્ટ ઈન્ડિઝ વચ્ચે ડોમિનિકામાં રમાઈ રહેલી પ્રથમ ટેસ્ટ મેચમાં કેપ્ટન રોહિત શર્માએ ધમાકેદાર ઇનિંગ રમી અને તેની 10મી ટેસ્ટ સદી ફટકારી. યશસ્વી જયસ્વાલ સાથે ઓપનિંગ કરવા આવેલા ભારતીય કેપ્ટને ધીમી ઇનિંગ રમી હતી પરંતુ બાદમાં તેણે લય પકડીને 103 રન બનાવ્યા હતા.

વિદેશની ધરતી પર ટેસ્ટ ક્રિકેટમાં રોહિત શર્માની આ એકમાત્ર બીજી સદી છે. અગાઉ 2021માં તેણે ઈંગ્લેન્ડમાં સદી ફટકારી હતી. સક્રિય ક્રિકેટરોમાં સૌથી વધુ સદી ફટકારવાના મામલે તે સંયુક્ત રીતે ચોથા નંબર પર છે અને ટોચના 5 ખેલાડીઓની યાદીમાં છે. રોહિત શર્માએ પોતાની 51મી ટેસ્ટ મેચમાં 10મી સદી ફટકારી છે.

રોહિતે 2013માં વેસ્ટ ઈન્ડિઝ ક્રિકેટ ટીમ સામે ટેસ્ટ ડેબ્યૂ કર્યું હતું. લગભગ એક દાયકા સુધી ચાલેલી કારકિર્દીમાં તેની 51મી ટેસ્ટ રમી રહેલા રોહિતે તેના 3,500 રન પૂરા કર્યા છે. તે ટેસ્ટ ફોર્મેટમાં આ આંક સુધી પહોંચનાર ભારતનો 20મો બેટ્સમેન બન્યો છે.તેણે વેસ્ટ ઈન્ડિઝ સામે 5 ઇનિંગ્સમાં 400થી વધુ રન બનાવ્યા છે, જેમાં 3 સદી સામેલ છે.

જણાવી દઈએ કે ભારત અને વેસ્ટ ઈન્ડિઝ વચ્ચે રમાઈ રહેલી મેચમાં મુલાકાતી ટીમ મજબૂત સ્થિતિમાં પહોંચી ગઈ છે. બે દિવસની રમતના અંતે ભારતે 312 રન બનાવી લીધા છે અને 162 રનની લીડ મેળવી લીધી છે.