એજબેસ્ટન ખાતે ભારત અને ઈંગ્લેન્ડ વચ્ચેની પાંચમી પુનઃનિર્ધારિત ટેસ્ટ મેચ પર યજમાનોએ પોતાની પકડ મજબૂત કરી હતી. ચોથા દિવસની રમતના અંતે ભારતે આપેલા 378 રનના લક્ષ્યાંકનો પીછો કરતા ઈંગ્લેન્ડે 3 વિકેટના નુકસાને 259 રન બનાવ્યા હતા.
ઇંગ્લેન્ડને આ સારી સ્થિતિમાં લાવવામાં જો રૂટ અને જોની બેરસ્ટોનો મહત્વનો ભાગ હતો. બંને ખેલાડીઓ વચ્ચે ચોથી વિકેટ માટે 150 રનની ભાગીદારી થઈ હતી. આ દરમિયાન રૂટે 76 રન અને બેયરસ્ટોએ 72 રનની અણનમ ઇનિંગ રમી હતી. રૂટે તેની ઇનિંગ્સના આધારે વિરાટ કોહલીનો મોટો રેકોર્ડ તોડી નાખ્યો છે.
રૂટ હવે ભારત અને ઈંગ્લેન્ડ વચ્ચેની ટેસ્ટ શ્રેણીમાં 671 રન સાથે સૌથી વધુ રન બનાવનાર ખેલાડીઓની યાદીમાં બીજા નંબરે પહોંચી ગયો છે. તેણે વિરાટ કોહલીના 655 રનને પાછળ છોડી દીધા છે. કોહલીએ 2016/17માં ઈંગ્લેન્ડ સામે આટલા રન બનાવ્યા હતા. ભારત અને ઈંગ્લેન્ડ વચ્ચેની ટેસ્ટ શ્રેણીમાં સૌથી વધુ રન બનાવનાર ખેલાડીની વાત કરીએ તો આ રેકોર્ડ ઈંગ્લેન્ડના ગ્રેહામ ગૂચના નામે છે, જેણે 1990માં 752 રન બનાવ્યા હતા.
ભારત-ઈંગ્લેન્ડ ટેસ્ટ શ્રેણીમાં સૌથી વધુ રન બનાવનાર
752 ગ્રેહામ ગૂચ, ઇંગ્લેન્ડમાં 1990
671 જો રૂટ, 2021-22 ઈંગ્લેન્ડમાં*
655 વિરાટ કોહલી, ભારતમાં 2016/17
615 માઈકલ વોન, 2002 ઈંગ્લેન્ડમાં
602 રાહુલ દ્રવિડ, 2002 ઈંગ્લેન્ડમાં