ડે-નાઈટ ટેસ્ટ મેચોના ઈતિહાસમાં ઓસ્ટ્રેલિયાનો દબદબો યથાવત છે. આ ટીમે અત્યાર સુધીમાં તેની તમામ 8 ડે-નાઈટ ટેસ્ટ મેચ જીતી છે અને ટીમ ઈંગ્લેન્ડ સામે એડિલેડમાં રમાઈ રહેલી એશિઝ સિરીઝની ડે-નાઈટ ટેસ્ટમાં પણ જીતની રાહ જોઈ રહી છે. ડે-નાઈટ ટેસ્ટમાં ઓસ્ટ્રેલિયાના આ વર્ચસ્વનું મુખ્ય કારણ ઝડપી બોલર મિચેલ સ્ટાર્ક છે, જેણે ગુલાબી બોલથી સૌથી વધુ વિકેટો લીધી છે. સ્ટાર્કે હવે વધુ એક રેકોર્ડ પોતાના નામે કરી લીધો છે.
ડાબોડી બોલર સ્ટાર્ક ડે-નાઈટ ટેસ્ટમાં 50 વિકેટ લેનાર પ્રથમ બોલર બની ગયો છે. સ્ટાર્કે ઇંગ્લેન્ડ સામે એડિલેડ ટેસ્ટના પ્રથમ દાવમાં સ્ટુઅર્ટ બ્રોડની વિકેટ લઈને આ સિદ્ધિ મેળવી હતી. સ્ટાર્કે આ ઇનિંગમાં 4 વિકેટ ઝડપી હતી.
આ રીતે સ્ટાર્કે 9 ડે-નાઈટ ટેસ્ટની 16 ઈનિંગ્સમાં આ 50 વિકેટ લીધી છે. આ દરમિયાન તેની એવરેજ 18.10 હતી અને સ્ટ્રાઈક રેટ 35.3 હતો. તેણે 3 વખત એક ઇનિંગમાં 5 વિકેટ લીધી છે અને પાકિસ્તાન સામે 6/66 તેનું સર્વશ્રેષ્ઠ પ્રદર્શન છે.
આ યાદીમાં બીજા અને ત્રીજા નંબરે ઓસ્ટ્રેલિયાના દિગ્ગજ પણ છે. સ્ટાર્કના સાથી ઝડપી બોલર જોશ હેઝલવુડે 13 ઇનિંગ્સમાં 32 વિકેટ ઝડપી છે. તે જ સમયે, ઓફ સ્પિનર નાથન લિયોને પણ 32 વિકેટ લીધી છે, પરંતુ તેણે આ માટે 16 ઇનિંગ્સમાં બોલિંગ કરી છે.