ભારત અને બાંગ્લાદેશ વચ્ચે ટેસ્ટ શ્રેણીની પ્રથમ મેચ ચેન્નાઈના ચેપોક સ્ટેડિયમ ખાતે રમાઈ હતી, જ્યાં મેચના ચોથા દિવસે, ટીમ ઈન્ડિયાએ બાંગ્લાદેશને 280 રનથી હરાવીને જીત મેળવી હતી.
આ સાથે રોહિત શર્માની ટીમ ઈન્ડિયાએ તે સિદ્ધિ મેળવી છે જેની 92 વર્ષથી રાહ જોવાઈ રહી હતી. મહેન્દ્ર સિંહ ધોની અને વિરાટ કોહલીની કેપ્ટનશીપમાં પણ ટીમ ઈન્ડિયા આ સિદ્ધિ હાંસલ કરી શકી નથી.
વાસ્તવમાં ભારતીય ટેસ્ટ ક્રિકેટના ઈતિહાસમાં આ પહેલીવાર બન્યું છે કે જ્યારે ટીમ ઈન્ડિયાએ ટેસ્ટ ફોર્મેટમાં હાર કરતાં વધુ જીત મેળવી હોય. ભારતે અત્યાર સુધીમાં કુલ 580 ટેસ્ટ મેચ રમી છે, જેમાંથી તેણે 179માં જીત અને 178માં હારનો સામનો કરવો પડ્યો છે. આ સમયગાળા દરમિયાન ટીમ ઈન્ડિયાએ 222 ટેસ્ટ ડ્રો કરી છે જ્યારે એક મેચ ટાઈ રહી છે.
ભારત આ સિદ્ધિ મેળવનાર સાતમો દેશ બની ગયો છે. તેના પહેલા ઓસ્ટ્રેલિયા (1 મેચ), અફઘાનિસ્તાન (3 મેચ), પાકિસ્તાન (16 મેચ), ઈંગ્લેન્ડ (23 મેચ), વેસ્ટ ઈન્ડિઝ (99 ટેસ્ટ) અને દક્ષિણ આફ્રિકા (340) આ સિદ્ધિ મેળવી ચૂક્યા છે. જ્યારે ન્યુઝીલેન્ડ, શ્રીલંકા, ઝિમ્બાબ્વે, બાંગ્લાદેશ અને આયર્લેન્ડ અત્યાર સુધી આવું કરી શક્યા નથી.
કેપ્ટન તરીકે રોહિત શર્મા અત્યાર સુધી ટેસ્ટ ફોર્મેટમાં સંપૂર્ણ હિટ રહ્યો છે. તેની કેપ્ટન્સીમાં ટીમ ઈન્ડિયાએ 17 ટેસ્ટ રમી છે, જેમાંથી ટીમે 11 મેચ જીતી છે. નોંધનીય છે કે આ સમયગાળા દરમિયાન ભારતે એક પણ શ્રેણી ગુમાવી નથી.
રોહિતની કપ્તાનીમાં ભારતે શ્રીલંકાને 2-0થી હરાવ્યું હતું. ઓસ્ટ્રેલિયાને 2-1થી હરાવ્યું. વેસ્ટ ઈન્ડિઝનો 1-0થી પરાજય થયો હતો. અને ઈંગ્લેન્ડનો 4-1થી પરાજય થયો હતો. આ દરમિયાન દક્ષિણ આફ્રિકા સાથેની ટેસ્ટ શ્રેણી પણ 1-1થી ડ્રો રહી હતી. હવે હિટમેનની કપ્તાનીમાં ટીમ ઈન્ડિયાએ બાંગ્લાદેશને 1-0થી હરાવ્યું છે.