ભારતની ઇનિંગ દરમિયાન ‘પાકિસ્તાન મુર્દાબાદ’ના નારા લાગ્યા, વીડિયો થયો વાયરલ

ભારત અને ન્યુઝીલેન્ડ વચ્ચે બે ટેસ્ટ મેચની શ્રેણીની પ્રથમ ટેસ્ટ આજથી શરૂ થઈ ગઈ છે. કાનપુરના ગ્રીન પાર્ક સ્ટેડિયમમાં આ મેચ જોવા માટે મોટી સંખ્યામાં દર્શકો આવ્યા હતા. ભારતે ટોસ જીતીને પ્રથમ બેટિંગ કરવાનો નિર્ણય કર્યો હતો.

ભારતની ઇનિંગ દરમિયાન મેદાનમાં પાકિસ્તાન મુર્દાબાદના નારા લાગ્યા હતા. તેનો વીડિયો સોશિયલ મીડિયામાં વાયરલ થઈ રહ્યો છે. ભારતીય પ્રશંસકોના એક વર્ગે પ્રથમ સત્રમાં પાકિસ્તાન વિરુદ્ધ સૂત્રોચ્ચાર કર્યા હતા.

આ ઘટના ભારતીય ઇનિંગ્સની છઠ્ઠી ઓવર દરમિયાન બની હતી. આ સમયે ભારત તરફથી મયંક અગ્રવાલ અને શુભમન ગિલની જોડી મેદાનમાં હતી. જ્યારે કેટલાક ક્રિકેટ ચાહકોએ પાકિસ્તાન મુર્દાબાદના નારા લગાવ્યા હતા. ભારત અને પાકિસ્તાન વચ્ચે 2012થી કોઈ દ્વિપક્ષીય શ્રેણી રમાઈ નથી. હા, બંનેએ ICC ટૂર્નામેન્ટમાં ચોક્કસપણે એકબીજાનો સામનો કર્યો છે. બંને દેશો વચ્ચે દ્વિપક્ષીય શ્રેણી ન રમવાનું કારણ બંને દેશો વચ્ચેના સંબંધો છે.

બંને ટીમો તાજેતરમાં ટી-20 વર્લ્ડ કપમાં આમને સામને આવી હતી. આ મેચમાં ભારતનો પાકિસ્તાનના હાથે 10 વિકેટે પરાજય થયો હતો. કાનપુર ટેસ્ટની વાત કરીએ તો પહેલા દિવસની રમત પૂરી થવા સુધી ભારતે 84 ઓવરમાં ચાર વિકેટે 258 રન બનાવ્યા હતા. શ્રેયસ અય્યર 75 અને રવિન્દ્ર જાડેજા 50 રને અણનમ છે.