ટેસ્ટ સિરીઝ: ઓસ્ટ્રેલિયા પ્રવાસમાં ભારત બે દિવસીય ડે-નાઈટ પ્રેક્ટિસ મેચ રમશે

ભારતીય ક્રિકેટ ટીમ આ વર્ષના અંતમાં બોર્ડર ગાવસ્કર ટ્રોફી માટે ઓસ્ટ્રેલિયા સામેની પાંચ ટેસ્ટ મેચની શ્રેણી દરમિયાન ઓસ્ટ્રેલિયાની પ્રાઇમ મિનિસ્ટર ઇલેવન સામે બે દિવસીય ડે-નાઇટ પ્રેક્ટિસ મેચ રમશે.

ભારત અને ઓસ્ટ્રેલિયા વચ્ચે 5 ટેસ્ટ મેચોની શ્રેણીની પ્રથમ મેચ 22 નવેમ્બરથી પર્થમાં રમાશે. 1991-92 બાદ આ પ્રથમ વખત હશે જ્યારે આ બંને ટીમો વચ્ચે પાંચ ટેસ્ટ મેચની શ્રેણી રમાશે. ક્રિકેટ ઓસ્ટ્રેલિયાએ તેની વેબસાઈટ પર જણાવ્યું છે કે ભારતીય ટીમ 30 નવેમ્બરથી કેનબેરાના મનુકા ઓવલ ખાતે વડાપ્રધાન ઈલેવન સામે બે દિવસીય ડે-નાઈટ પ્રેક્ટિસ મેચ રમશે.

ભારતીય ટીમને એડિલેડમાં ડે-નાઈટ ટેસ્ટ મેચની તૈયારીમાં મદદ કરવા માટે આ પ્રેક્ટિસ મેચ ઉમેરવામાં આવી છે. ભારતે 2020-21 ઓસ્ટ્રેલિયા પ્રવાસમાં ડે-નાઈટ ટેસ્ટ મેચ પણ રમી હતી.