RCBમાં આવતાની સાથે ઓલરાઉન્ડરનું ભાગ્ય ખુલ્લું, કિવિ સામે પ્રથમ ટેસ્ટ મેચ રમશે

ઈન્ડિયન પ્રીમિયર લીગ (IPL)ની હરાજીમાં રોયલ ચેલેન્જર્સ બેંગ્લોર (RCB) એ ઈંગ્લેન્ડના 21 વર્ષીય ઓલરાઉન્ડર જેકબ બેથેલને 2.6 કરોડ રૂપિયામાં ખરીદ્યો છે. આરસીબી દ્વારા તેને ખરીદ્યાને 24 કલાક પણ પસાર થયા ન હતા અને જેકબ માટે સારા સમાચાર આવ્યા. તેને ન્યૂઝીલેન્ડ સામેની પ્રથમ ટેસ્ટ માટે ઈંગ્લેન્ડની પ્લેઈંગ ઈલેવનમાં સામેલ કરવામાં આવ્યો છે. આ રીતે જેકબ ટેસ્ટ ડેબ્યૂ કરવા માટે તૈયાર છે. આ વર્ષે તેણે ઈંગ્લેન્ડ તરફથી ટી20 અને વનડેમાં પણ ડેબ્યૂ કર્યું હતું.

T-20 ઇન્ટરનેશનલ ડેબ્યૂ કરનાર જેકબે 19 સપ્ટેમ્બરના રોજ ODIમાં પણ ડેબ્યૂ કર્યું હતું. તેણે આ બંને ફોર્મેટમાં પોતાની પ્રથમ મેચ ઓસ્ટ્રેલિયા સામે રમી હતી. અત્યાર સુધીમાં આઠ વનડે રમી ચૂકેલા જેકબે આ ફોર્મેટમાં એક અડધી સદી સહિત 167 રન બનાવ્યા છે અને ચાર વિકેટ પણ લીધી છે. સાત T-20 ઈન્ટરનેશનલ મેચોમાં તેણે બે અડધી સદી સહિત 173 રન બનાવ્યા છે. 21 વર્ષ અને 17 દિવસની ઉંમરે, તે ઈંગ્લેન્ડ માટે T20 ઈન્ટરનેશનલ અડધી સદી ફટકારનાર સૌથી યુવા બેટ્સમેન છે.

હવે તે પોતાના ટેસ્ટ ડેબ્યૂ માટે તૈયાર છે. જેકબે અત્યાર સુધી 20 ફર્સ્ટ ક્લાસ મેચ રમી છે જેમાં તેણે 30 ઇનિંગ્સમાં પાંચ અડધી સદી સહિત 738 રન બનાવ્યા છે. જેકબે ફર્સ્ટ ક્લાસ ક્રિકેટમાં સાત વિકેટ લીધી છે.