ભારત-ઓસ્ટ્રેલિયા ટેસ્ટ શ્રેણીએ 2018 માં વિશ્વનું ધ્યાન ખેંચ્યું હતું, જ્યારે ભારતે પ્રથમ વખત ઓસ્ટ્રેલિયાને તેની જ ધરતી પર હરાવ્યું હતું. કાંગારૂઓને તેમની જ ધરતી પર હરાવનારી ભારત પ્રથમ એશિયન ટીમ બની હતી.
બે વર્ષ બાદ જાણીતા ખેલાડીઓની ગેરહાજરીમાં ટીમ ઈન્ડિયાએ ફરી એકવાર ઓસ્ટ્રેલિયાને તેના ઘરઆંગણે ટક્કર આપી હતી. આ દરમિયાન તેણે ગબ્બાના અભિમાનને પણ તોડી નાખ્યું. આ બે મોટી જીત બાદ મેચની સંખ્યા 4 થી વધારીને 5 કરવાની વાત થઈ હતી. હવે એવા અહેવાલ છે કે આગામી FTPમાં બોર્ડર-ગાવસ્કર ટ્રોફીમાં 4ને બદલે 5 મેચોની શ્રેણીનું આયોજન કરવામાં આવશે.
ESPNcricinfoના રિપોર્ટ અનુસાર, ભારત 2024-25માં ઓસ્ટ્રેલિયાનો પ્રવાસ કરશે, જ્યારે કાંગારૂ ટીમ 2027માં ભારત આવશે. આ બંને અવસર પર 5 મેચની ટેસ્ટ શ્રેણીનું આયોજન કરવામાં આવશે. આ બંને શ્રેણી અનુક્રમે 2023-25 અને 2025-27 વર્લ્ડ ટેસ્ટ ચેમ્પિયનશિપનો ભાગ છે.
રિપોર્ટ અનુસાર, ભારત 2023-25માં ઓસ્ટ્રેલિયા, વેસ્ટ ઈન્ડિઝ અને દક્ષિણ આફ્રિકાનો પ્રવાસ કરશે, જ્યારે ન્યૂઝીલેન્ડ, ઈંગ્લેન્ડ અને બાંગ્લાદેશ ઘરઆંગણે શ્રેણી રમશે.
વર્લ્ડ ટેસ્ટ ચેમ્પિયનશિપ 2025-27ની વાત કરીએ તો, ભારત આ ચક્રમાં ન્યૂઝીલેન્ડ, ઈંગ્લેન્ડ અને શ્રીલંકાનો પ્રવાસ કરશે. આ સાથે જ ઓસ્ટ્રેલિયા, વેસ્ટ ઈન્ડિઝ અને દક્ષિણ આફ્રિકા સામે ઘરઆંગણે શ્રેણી રમાશે.
FTPના ડ્રાફ્ટ મુજબ WTCના આગામી રાઉન્ડમાં ભારતની 38 મેચ, ઈંગ્લેન્ડની 42 અને ઓસ્ટ્રેલિયાની 41 મેચ છે. આ સિવાય માત્ર બે જ દેશ એવા છે જેમની મેચોની સંખ્યા 30થી વધુ છે. તેઓ બાંગ્લાદેશ (34) અને ન્યુઝીલેન્ડ (32) છે.