ભારતીય ક્રિકેટ ટીમ દક્ષિણ આફ્રિકા સામે નિર્ણાયક ટેસ્ટ મેચ રમી રહી છે. મેચના પ્રથમ દિવસે ટોસ જીતીને બેટિંગ કરવાનો નિર્ણય લેનાર ભારતીય ટીમ માત્ર 223 રન જ બનાવી શકી હતી.
મેચના બીજા દિવસે, જસપ્રિત બુમરાહની પાંચ વિકેટે ભારતને 13 રનની લીડ પર પહોંચાડ્યું કારણ કે યજમાન દક્ષિણ આફ્રિકા 210 રનમાં ઓલઆઉટ થઈ ગયું હતું. હવે મેચના ત્રીજા દિવસે ભારત સામે મોટો સ્કોર બનાવવાનો પડકાર રહેશે.
મેચના બીજા દિવસે ભારતે 2 વિકેટે 57 રન બનાવ્યા હતા. કેપ્ટન વિરાટ કોહલી અને ચેતેશ્વર પુજારા બેટિંગ કરી રહ્યા હતા. ભારત માટે દક્ષિણ આફ્રિકાના બોલરોનો સામનો કરવો મોટો પડકાર હશે. આજની મેચમાં તમામની નજર ટીમ ઈન્ડિયાના વાઈસ કેપ્ટન પદ પરથી હટાવાયેલા અજિંક્ય રહાણે પર રહેશે. સતત રન બનાવવા માટે તડપતા આ ખેલાડી માટે આ છેલ્લી શ્રેણી સાબિત થઈ શકે છે. પ્રથમ દાવમાં પણ રહાણે 9 રન બનાવીને આઉટ થયો હતો.
રહાણે છેલ્લી કેટલીક ઇનિંગ્સમાં રન બનાવવામાં સતત નિષ્ફળ રહ્યો છે. 2020માં ઓસ્ટ્રેલિયા પ્રવાસ પર સદી ફટકાર્યા બાદથી તે કોઈ મોટી ઇનિંગ્સ રમી શક્યો નથી. ખરાબ પ્રદર્શનના કારણે તેને વાઈસ કેપ્ટનના પદ પરથી હટાવી દેવામાં આવ્યો હતો. તેણે છેલ્લી 25 ઇનિંગ્સમાં 3 વખત પચાસનો આંકડો પાર કર્યો છે.
પ્રથમ દાવમાં 9 રને આઉટ થયેલા રહાણે માટે બેટિંગ કોચ વિક્રમ રાઠોડે પણ સ્પષ્ટ સંકેત આપ્યા છે. મીડિયા સાથે વાત કરતાં તેણે કહ્યું હતું કે જો તે આગામી ઇનિંગ્સમાં રન બનાવવામાં નિષ્ફળ જશે તો તેના સ્થાને પ્લેઇંગ ઇલેવનમાં સામેલ કરવા માટે જે લાયક હશે તેને ધ્યાનમાં લેવામાં આવશે.