આંતરરાષ્ટ્રીય ક્રિકેટમાં ભારતના નવા સેન્સેશન તરીકે ઉભરી આવેલા સૂર્યકુમાર યાદવ સતત રન બનાવી રહ્યો છે. તેના T20 વર્લ્ડ કપ પહેલા તેના શાનદાર ફોર્મને ચાલુ રાખીને, તેણે ગુવાહાટીમાં 22 બોલમાં 61 રન બનાવ્યા.
તેણે 18 બોલમાં ચાર ચોગ્ગા અને ચાર છગ્ગાની મદદથી પોતાની અડધી સદી પૂરી કરી હતી. તેણે યુવરાજ સિંહ પછી ભારત માટે T20 ઈન્ટરનેશનલમાં બીજી સૌથી ઝડપી અડધી સદી ફટકારી.
સૂર્યકુમારની આ સતત ત્રીજી અને કારકિર્દીની નવમી ફિફ્ટી છે. આ પહેલા તેણે તિરુવનંતપુરમમાં અણનમ 50 અને હૈદરાબાદમાં ઓસ્ટ્રેલિયા સામે 69 રન બનાવ્યા હતા. રવિવારના રોજ તેની કારકિર્દીની 33મી મેચની 31મી ઇનિંગ દરમિયાન સૂર્યાએ આંતરરાષ્ટ્રીય ટી20માં એક હજાર રન પણ પૂરા કર્યા. તે સૌથી ઓછા બોલમાં 1000 T20 રન બનાવવાના મામલે વિશ્વમાં પ્રથમ સ્થાને પહોંચી ગયો છે.
સૂર્યકુમાર યાદવે ગુવાહાટીમાં 277ના સ્ટ્રાઈક રેટથી રન બનાવતા તેની ઈનિંગ દરમિયાન પાંચ ચોગ્ગા અને પાંચ છગ્ગા ફટકાર્યા હતા. આ સાથે, તે T20 ઇન્ટરનેશનલમાં એક કેલેન્ડર વર્ષમાં 50 સિક્સર મારનાર વિશ્વનો પ્રથમ બેટ્સમેન બન્યો. વર્ષ 2022માં 22 મેચોની 22 ઇનિંગ્સમાં સૂર્યાના બેટમાંથી કુલ 50 સિક્સર નીકળી છે. તિરુવનંતપુરમમાં, તેણે આંતરરાષ્ટ્રીય T20માં એક વર્ષમાં સૌથી વધુ છગ્ગા મારવાનો મોહમ્મદ રિઝવાનનો રેકોર્ડ તોડ્યો. તેના ખાતામાં ભારત તરફથી રમતા 33 મેચની 31 ઇનિંગ્સમાં કુલ 62 સિક્સર છે.