પંજાબ કિંગ્સના સ્ટાર ક્રિકેટર શશાંક સિંહ પર તેમના પૂર્વ રસોઈયાએ મારપીટ, ગાળો અને ગેરકાયદે રીતે બંધક બનાવી રાખવાના ગંભીર આરોપો લગાવ્યા બાદ સમગ્ર મામલો ચર્ચામાં આવ્યો છે. હવે આ વિવાદ પર શશાંક સિંહે પ્રથમ વખત જાહેરમાં પોતાનો પક્ષ રજૂ કર્યો છે અને તમામ આરોપોને નકારી કાઢ્યા છે.
શશાંકે જણાવ્યું કે તેના અને તેના પરિવાર વિરુદ્ધ કરવામાં આવેલા આરોપો સંપૂર્ણપણે ખોટા છે. તેણે કહ્યું કે રસોઈયાને ન તો બંધક બનાવવામાં આવ્યો હતો અને ન તો તેની સાથે કોઈ પ્રકારની હિંસા કરવામાં આવી હતી. શશાંકના કહેવા મુજબ, તેઓ કોઈની સાથે અપશબ્દો બોલવામાં પણ વિશ્વાસ રાખતા નથી અને તેના પરિવારની છબીને નુકસાન પહોંચાડવાના પ્રયાસો થઈ રહ્યા છે.
બીજી તરફ ફરિયાદી વિપેન્દ્ર સિંહ તોમરે આરોપ લગાવ્યો છે કે તેઓ શશાંકના ભોપાલ સ્થિત નિવાસસ્થાને રસોઈયા તરીકે કામ કરવા ગયા હતા. પરંતુ કામનું વાતાવરણ અનુકૂળ ન લાગતાં જ્યારે તેણે નોકરી છોડવાની ઇચ્છા વ્યક્ત કરી, ત્યારે તેનો મોબાઇલ ફોન જપ્ત કરી લેવાયો અને તેની સાથે મારપીટ કરવામાં આવી. તેણે એવો પણ દાવો કર્યો કે શશાંક, તેના પિતા અને ડ્રાઇવરે મળીને તેની સાથે દુર્વ્યવહાર કર્યો હતો. ફરિયાદ બાદ પોલીસમાં FIR નોંધાઈ છે.
શશાંકના પિતા શૈલેશ સિંહ, જે નિવૃત્ત IPS અધિકારી છે, તેનું નામ પણ આ કેસમાં સામેલ છે. પોલીસે શશાંક, તેના પિતા અને ડ્રાઇવર સામે વિવિધ કલમો હેઠળ ગુનો નોંધ્યો છે અને સમગ્ર ઘટનાની તપાસ શરૂ કરી છે. મેડિકલ તપાસમાં ફરિયાદીને ઈજાના નિશાન મળ્યાનું પણ જણાવાયું છે, જોકે આક્ષેપોની સત્યતા અંગે અંતિમ નિર્ણય તપાસ પૂર્ણ થયા બાદ જ સ્પષ્ટ થશે.
હાલમાં આ મામલો તપાસ હેઠળ હોવાથી બંને પક્ષના દાવાઓની પોલીસ દ્વારા ચકાસણી કરવામાં આવી રહી છે. તપાસ પૂર્ણ થયા બાદ જ કાયદેસરની કાર્યવાહી અને હકીકત સ્પષ્ટ થશે.
🚨 Shashank Singh Breaks Silence on Cook Assault Allegations 🚨
🗣️ There is nothing like that. A person who arrives on the evening of the 25th and leaves on the morning of the 28th — how well can you really know him in such a short period of time?
He came to us claiming that he… pic.twitter.com/PgCh3k5VFh
— Central Cricket (@arshdeep3444) June 30, 2026