ભારતીય મહિલા ક્રિકેટ ટીમની કેપ્ટન હરમનપ્રીત કૌરે વધુ એક ઐતિહાસિક સિદ્ધિ પોતાના નામે નોંધાવી છે. ઇંગ્લેન્ડ સામે લોર્ડ્સ ખાતે રમાઈ રહેલી એકમાત્ર ટેસ્ટ મેચ દરમિયાન હરમનપ્રીતે આંતરરાષ્ટ્રીય ક્રિકેટમાં 9000 રનનો માઈલસ્ટોન પાર કર્યો. આ સાથે તે આ ઉપલબ્ધિ હાંસલ કરનાર માત્ર ત્રીજી ભારતીય મહિલા ક્રિકેટર બની છે.
લોર્ડ્સ જેવા ઐતિહાસિક મેદાન પર હરમનપ્રીતે જવાબદારીભરી બેટિંગ કરતાં શાનદાર અડધી સદી ફટકારી હતી. તેની ઇનિંગ્સના દમ પર ભારતે મજબૂત સ્થિતિ તરફ આગળ વધવાનું શરૂ કર્યું. આ દરમિયાન તેણે 9000 આંતરરાષ્ટ્રીય રન પૂર્ણ કરીને પોતાના લાંબા અને સફળ કારકિર્દીમાં વધુ એક સોનેરી સિદ્ધિ ઉમેરાઈ.
હરમનપ્રીત પહેલાં માત્ર મિતાલી રાજ અને સ્મૃતિ મંધાના જ ભારતીય મહિલા ક્રિકેટમાં 9000થી વધુ આંતરરાષ્ટ્રીય રન બનાવી શક્યા હતા. હવે હરમનપ્રીતનું નામ પણ આ પ્રતિષ્ઠિત યાદીમાં સામેલ થઈ ગયું છે. વર્ષોથી ભારતીય મહિલા ક્રિકેટમાં તેના સતત પ્રદર્શન, આક્રમક બેટિંગ અને શાનદાર નેતૃત્વને કારણે તે ટીમની સૌથી વિશ્વસનીય ખેલાડીઓમાંની એક બની ગઈ છે.
આ મેચમાં હરમનપ્રીતે માત્ર 9000 રનનો રેકોર્ડ જ બનાવ્યો નહીં, પરંતુ લોર્ડ્સના મેદાન પર ટેસ્ટ, વન-ડે અને ટી-20 – ત્રણેય આંતરરાષ્ટ્રીય ફોર્મેટમાં અડધી સદી નોંધાવનાર પ્રથમ ભારતીય ક્રિકેટર બનવાનો અનોખો રેકોર્ડ પણ પોતાના નામે કર્યો. આ સિદ્ધિ ભારતના કોઈપણ પુરુષ કે મહિલા ક્રિકેટરે અગાઉ હાંસલ કરી નહોતી.
36 વર્ષીય હરમનપ્રીત કૌર છેલ્લા ઘણા વર્ષોથી ભારતીય મહિલા ક્રિકેટની સૌથી મોટી મેચ વિનર તરીકે ઓળખાય છે. તેની આ નવી સિદ્ધિ માત્ર વ્યક્તિગત સફળતા નથી, પરંતુ ભારતીય મહિલા ક્રિકેટ માટે પણ ગૌરવની ક્ષણ છે. ચાહકો અને પૂર્વ ક્રિકેટરોએ સોશિયલ મીડિયા પર હરમનપ્રીતને અભિનંદન પાઠવ્યા છે અને તેની કારકિર્દીને ભારતીય મહિલા ક્રિકેટ માટે પ્રેરણારૂપ ગણાવી છે.
हरमनप्रीत कौर ने इंटरनेशनल क्रिकेट में हासिल की बड़ी उपलब्धि, 9000 रन बनाने वाली बनीं तीसरी भारतीयhttps://t.co/GOFMkV7gs6
— India TV (@indiatvnews) July 10, 2026