બાંગ્લાદેશ ક્રિકેટ બોર્ડ (BCB)એ 2027ના ICC વનડે વર્લ્ડ કપને ધ્યાનમાં રાખીને ટીમના નેતૃત્વમાં મોટો ફેરફાર કર્યો છે. અનુભવી વિકેટકીપર-બેટ્સમેન લિટન દાસને બાંગ્લાદેશની વનડે ટીમનો નવો કેપ્ટન જાહેર કરવામાં આવ્યો છે. તેઓ મેહદી હસન મિરાઝનું સ્થાન લેશે, જેને તાજેતરમાં ટીમના નબળા પ્રદર્શન બાદ કેપ્ટનશિપમાંથી હટાવવામાં આવ્યા છે.
મેહદી હસન મિરાઝે જૂન 2025થી બાંગ્લાદેશની વનડે ટીમનું નેતૃત્વ સંભાળ્યું હતું. તેના નેતૃત્વ હેઠળ ટીમે કુલ 20 વનડે મેચ રમી હતી, જેમાં 10 જીત, 9 હાર અને એક મેચનું પરિણામ આવ્યું નહોતું. જોકે ઝિમ્બાબ્વે સામેની તાજેતરની વનડે શ્રેણીમાં 1-2થી મળેલી હાર બાદ બોર્ડે નવા નેતૃત્વ તરફ આગળ વધવાનો નિર્ણય લીધો છે.
31 વર્ષીય લિટન દાસ હાલમાં બાંગ્લાદેશની ટી20 ટીમના કેપ્ટન પણ છે. હવે તેને વનડે ટીમની પણ જવાબદારી સોંપવામાં આવી છે. લિટન અગાઉ કાર્યકારી વનડે કેપ્ટન તરીકે પણ ટીમનું નેતૃત્વ કરી ચૂક્યા છે. તેના નેતૃત્વમાં બાંગ્લાદેશે સાતમાંથી ત્રણ મેચમાં જીત મેળવી હતી. ટી20 ફોર્મેટમાં પણ તેની કેપ્ટનશિપ હેઠળ ટીમનું પ્રદર્શન સંતોષકારક રહ્યું છે અને વેસ્ટ ઇન્ડિઝ સામેની ઐતિહાસિક ક્લીન સ્વીપ જેવી સિદ્ધિ પણ નોંધાઈ છે.
બેટિંગની વાત કરીએ તો લિટન દાસ બાંગ્લાદેશના સૌથી વિશ્વસનીય બેટ્સમેનોમાંના એક માનવામાં આવે છે. તેણે 100થી વધુ વનડે મેચોમાં લગભગ 3,000 રન બનાવ્યા છે, જેમાં પાંચ સદી અને અનેક અડધી સદીનો સમાવેશ થાય છે. હવે બોર્ડને આશા છે કે તેના અનુભવ અને શાંત સ્વભાવના નેતૃત્વ હેઠળ બાંગ્લાદેશની ટીમ 2027ના વનડે વર્લ્ડ કપ માટે મજબૂત તૈયારી કરી શકશે. ચાહકોની નજર હવે લિટન દાસની કેપ્ટનશિપ હેઠળ બાંગ્લાદેશના આગામી પ્રદર્શન પર રહેશે.
Litton Das has been appointed captain of the Bangladesh ODI team, taking over from Mehidy Hasan Miraz 🇧🇩 pic.twitter.com/eb2Qt7n2Nj
— Cricinfo (@cricinfo) July 29, 2026