ટેસ્ટ રેન્કિંગ: રીષભ પંતનો ટેસ્ટમાં ધમાલ, કરી રોહિત શર્માની બરાબરી

રીષભ પંતે ઇંગ્લેન્ડ સામેની તાજેતરની ટેસ્ટ શ્રેણીની છેલ્લી મેચમાં શાનદાર સદી ફટકારી હતી…

ભારતીય ક્રિકેટ ટીમના વિકેટકીપર બેટ્સમેન રીષભ પંતે ઇંગ્લેન્ડ સામેની તાજેતરની શ્રેણીમાં જોરદાર રમત બતાવી હતી. આઈસીસીની નવી બહાર પાડવામાં આવેલી ટેસ્ટ રેન્કિંગમાં આ પ્રદર્શન માટે તેને પુરસ્કાર મળ્યો છે. પંત તેની કારકિર્દીમાં પ્રથમ વખત ટેસ્ટ બેટ્સમેનની રેન્કિંગમાં સાતમા સ્થાને પહોંચવામાં સફળ રહ્યો છે. પ્રથમ વખત તેને ટોચના દસ બેટ્સમેનોની યાદીમાં સામેલ કરવામાં આવ્યો છે.

રીષભ પંતે ઇંગ્લેન્ડ સામેની તાજેતરની ટેસ્ટ શ્રેણીની છેલ્લી મેચમાં શાનદાર સદી ફટકારી હતી. આ પહેલા પણ તેણે ઓસ્ટ્રેલિયા સામે ખૂબ સારી બેટિંગ કરી હતી. પંતે તેની સતત બેટિંગ પ્રદર્શનના આધારે ટોપ ટેનમાં સ્થાન મેળવ્યું છે. ઇંગ્લેન્ડ સામે રમાયેલી શ્રેણી બાદ પંત 7 સ્થાનનો ઉછાળો મેળવી 7 મા સ્થાને છે.

આઇસીસીની નવી બહાર પાડવામાં આવેલી બેટિંગ ટેસ્ટ રેન્કિંગમાં ન્યૂઝિલેન્ડનો કેન વિલિયમસન 919 પોઇન્ટ સાથે પ્રથમ સ્થાને છે. ઓસ્ટ્રેલિયાનો સ્ટીવ સ્મિથ 891 પોઇન્ટ સાથે બીજા ક્રમે છે જ્યારે 8 માર્કસ સાથે ત્રીજા ક્રમે માર્નસ લબુશાને છે. ઈંગ્લેન્ડનો કેપ્ટન જો રૂટ ચોથા ક્રમે છે, જ્યારે ભારતીય કેપ્ટન વિરાટ કોહલી પાંચમા સ્થાને છે.