ભારત અને પાકિસ્તાન વચ્ચે વધી રહેલા લશ્કરી સંઘર્ષને કારણે શુક્રવારે ઇન્ડિયન પ્રીમિયર લીગ (IPL) એક અઠવાડિયા માટે મુલતવી રાખવામાં આવી હતી. સરહદ પારથી સતત હુમલાઓ બાદ, એક અઠવાડિયા પછી ટૂર્નામેન્ટ શરૂ કરવી શક્ય લાગતું નથી, આવી સ્થિતિમાં BCCI ટૂર્નામેન્ટ પૂર્ણ કરવા માટે વિકલ્પ શોધી રહ્યું છે. બીસીસીઆઈ આઈપીએલના આયોજનને ભારતના કેટલાક શહેરો સુધી મર્યાદિત કરી શકે છે.
બીસીસીઆઈ હાલમાં સરહદ પરના વિકાસ પર નજર રાખી રહ્યું છે અને વધુ યોજનાઓ પર ચર્ચા શરૂ કરી દીધી છે, ક્રિકબઝે અહેવાલ આપ્યો છે કે બોર્ડ લોજિસ્ટિક્સ, સમય અને સુરક્ષાને ધ્યાનમાં રાખીને ટૂર્નામેન્ટના બાકીના મેચ ભારતના ચારથી પાંચ શહેરોમાં ખસેડવાનું વિચારી રહ્યું છે. બધી મેચો આ શહેરોમાં રમાશે.
આવતા અઠવાડિયે ટુર્નામેન્ટ ફરી શરૂ થશે ત્યારે બાકીની સિઝનનું આયોજન કરવા માટે કોલકાતા, ચેન્નાઈ, હૈદરાબાદ અને બેંગલુરુ મુખ્ય પસંદગીઓ તરીકે ઉભરી આવ્યા છે. ખેલાડીઓની સુરક્ષાની દ્રષ્ટિએ આ શહેર ઘણું સારું છે.
IPL 2025 માં હજુ 12 લીગ સ્ટેજ મેચ અને ચાર પ્લેઓફ મેચ બાકી છે. આંતરરાષ્ટ્રીય કેલેન્ડરને કારણે BCCI પર ટૂંકા સમયમાં સીઝન પૂર્ણ કરવાનું દબાણ છે. આવી સ્થિતિમાં, હવે વધુ ડબલ હેડર મેચો જોઈ શકાય છે.
ઈંગ્લેન્ડ અને વેલ્સ ક્રિકેટ બોર્ડે BCCI ને IPL 2025 ની બાકીની મેચો ઈંગ્લેન્ડમાં યોજવાની ઓફર કરી છે. ધ ક્રિકેટરના એક અહેવાલ મુજબ, ECB એ BCCI નો સંપર્ક કર્યો છે અને IPL 2025 ની બાકીની મેચો ઇંગ્લેન્ડમાં યોજવાની ઓફર કરી છે, જોકે BCCI એ હજુ સુધી આ અંગે કોઈ સત્તાવાર નિવેદન આપ્યું નથી. ભારતીય ટીમ જૂનમાં પાંચ મેચની ટેસ્ટ શ્રેણી માટે ઇંગ્લેન્ડનો પ્રવાસ કરવાની છે, તેથી આ પણ એક સારો વિકલ્પ લાગે છે.