પાકિસ્તાનના કેપ્ટન બાબર આઝમે એશિયા કપ 2023ની શરૂઆત મજબૂત રેકોર્ડ સાથે કરી છે. બાબર આઝમે મુલતાન ક્રિકેટ સ્ટેડિયમમાં નેપાળ સામે રમાયેલી ટૂર્નામેન્ટની પ્રથમ મેચમાં 151 રનની વિસ્ફોટક ઇનિંગ રમી હતી અને આ રીતે તેણે તેની 19મી ODI આંતરરાષ્ટ્રીય સદી ફટકારી હતી.
બાબર આઝમ સૌથી ઓછી ઇનિંગ્સમાં 19 ODI સદી ફટકારવાનો વર્લ્ડ રેકોર્ડ બનાવી ચૂક્યો છે, પરંતુ ભારત સામેની મેચ દરમિયાન પણ ઘણા રેકોર્ડ તેના નિશાના પર રહેશે. ભારત અને પાકિસ્તાન વચ્ચે એશિયા કપ 2023ની મેચ 2 સપ્ટેમ્બરે પલ્લેકેલે ઈન્ટરનેશનલ ક્રિકેટ સ્ટેડિયમમાં રમાશે. જો પાકિસ્તાની કેપ્ટન આ મેચમાં સદી ફટકારે છે તો આંતરરાષ્ટ્રીય ક્રિકેટમાં સૌથી ઓછી ઇનિંગ્સમાં 20 ODI સદી ફટકારવાનો વર્લ્ડ રેકોર્ડ બાબર આઝમના નામે નોંધાઈ જશે.
આ સિવાય બાબર આઝમ પાકિસ્તાન માટે વન-ડે ઈન્ટરનેશનલ ક્રિકેટમાં સૌથી વધુ સદી ફટકારવાના મામલે સઈદ અનવરની બરાબરી કરશે. સઈદ અનવરના ખાતામાં 20 ODI સદી છે. હાલમાં, મોહમ્મદ યુસુફ પાકિસ્તાન માટે ODIમાં સૌથી વધુ સદી ફટકારવાના મામલે ત્રીજા સ્થાને છે, જેણે 15 ODI સદી ફટકારી છે. બાબર આઝમ પહેલાથી જ ઘણા રેકોર્ડ પોતાના નામે કરી ચુક્યા છે અને વન-ડે ઈન્ટરનેશનલ ફોર્મેટમાં તેની સાતત્યતાની ચર્ચા દરેક જગ્યાએ થાય છે.
આ જ કારણ છે કે બાબર આઝમ વન ડે ઈન્ટરનેશનલમાં નંબર-1 બેટ્સમેન છે. જો આઈસીસી ઓડીઆઈ ઈન્ટરનેશનલ બેટ્સમેનોની રેન્કિંગ પર નજર કરીએ તો બાબર આઝમના ખાતામાં 877 રેટિંગ પોઈન્ટ છે, જ્યારે બીજા સ્થાને રહેલા દક્ષિણ આફ્રિકાના રાસી વેન ડેર ડ્યુસેનના ખાતામાં માત્ર 777 રેટિંગ પોઈન્ટ છે.