ભારતીય ક્રિકેટમાં રોહિત શર્મા અને વિરાટ કોહલીના ભવિષ્યને લઈને ફરી એકવાર ચર્ચાઓ તેજ બની છે. આ દરમિયાન પાકિસ્તાનના પૂર્વ ક્રિકેટર બાસિત અલીએ મોટું નિવેદન આપતાં દાવો કર્યો છે કે ઇંગ્લેન્ડ સામે લોર્ડ્સમાં રમાનારી ત્રીજી અને અંતિમ વનડે બાદ રોહિત શર્મા અને વિરાટ કોહલી બંને એકસાથે આંતરરાષ્ટ્રીય ક્રિકેટમાંથી નિવૃત્તિની જાહેરાત કરી શકે છે. જોકે, આ માત્ર બાસિત અલીનો વ્યક્તિગત અંદાજ છે અને તેની કોઈ સત્તાવાર પુષ્ટિ થઈ નથી.
બાસિત અલીએ પોતાના યુટ્યુબ ચેનલ પર કહ્યું કે જો રોહિત શર્મા પર સતત દબાણ રહેશે તો તેની અસર વિરાટ કોહલી પર પણ પડી શકે છે. તેણે યાદ અપાવ્યું કે જેમ રોહિતે ટેસ્ટ ક્રિકેટમાંથી નિવૃત્તિ લીધી હતી અને થોડા જ દિવસોમાં વિરાટ કોહલીએ પણ ટેસ્ટને અલવિદા કહ્યું હતું, તેવી જ સ્થિતિ હવે વનડે ક્રિકેટમાં પણ સર્જાઈ શકે છે.
બાસિત અલીનું માનવું છે કે માત્ર થોડા ખરાબ પ્રદર્શનના આધારે સિનિયર ખેલાડીઓને ટીમમાંથી બહાર કરવાનો વિચાર યોગ્ય નથી. તેના અનુસાર, જો કોઈ ખેલાડી સતત ટીમ માટે યોગદાન આપી રહ્યો હોય તો તેને રમવાની તક મળતી રહેવી જોઈએ. તેણે ચેતવણી આપી કે જો અનુભવી ખેલાડીઓ પર વધુ દબાણ બનાવવામાં આવશે તો ભારતીય ક્રિકેટને મોટું નુકસાન થઈ શકે છે.
જોકે બીજી તરફ ભારતીય ક્રિકેટ કંટ્રોલ બોર્ડ (BCCI)ના સચિવ દેવજીત સૈકિયાએ આવી તમામ અટકળોને નકારી કાઢી છે. તેણે સ્પષ્ટ કહ્યું છે કે રોહિત શર્મા વનડે ક્રિકેટમાંથી નિવૃત્તિ લઈ રહ્યા નથી અને તેઓ ભારત માટે આગળ પણ રમતા રહેશે. આથી હાલમાં રોહિત અથવા વિરાટ તરફથી સંયુક્ત નિવૃત્તિ અંગે કોઈ સત્તાવાર જાહેરાત કરવામાં આવી નથી.
હવે તમામની નજર લોર્ડ્સમાં રમાનારી અંતિમ વનડે પર રહેશે. મેચ બાદ બંને દિગ્ગજ ખેલાડીઓ શું નિર્ણય લે છે તે જોવું રસપ્રદ રહેશે, પરંતુ હાલ સુધી તેની નિવૃત્તિને લઈને સોશિયલ મીડિયા અને મીડિયા અહેવાલોમાં ચાલી રહેલી ચર્ચાઓને કોઈ સત્તાવાર સમર્થન મળ્યું નથી.