T20 વર્લ્ડ કપ 2024 પહેલા પાકિસ્તાનની ટીમ હાલમાં ઈંગ્લેન્ડના પ્રવાસે છે, જ્યાં તે યજમાન ટીમ સામે 4 મેચની T20 શ્રેણી રમી રહી છે. આ શ્રેણીની છેલ્લી મેચ લંડનના ઓવલ મેદાન પર બંને ટીમો વચ્ચે રમાઈ રહી છે, જેમાં ઈંગ્લેન્ડની ટીમે ટોસ જીતીને પ્રથમ બોલિંગ કરવાનો નિર્ણય લીધો છે.
પાકિસ્તાની ટીમના કેપ્ટન બાબર આઝમે આ મેચમાં 22 બોલમાં 36 રન બનાવ્યા જેની સાથે તેણે T20 ઈન્ટરનેશનલમાં પોતાના 4000 રન પણ પૂરા કર્યા. બાબર વિશ્વ ક્રિકેટમાં આવું કરનાર વિરાટ કોહલી બાદ બીજો ખેલાડી બની ગયો છે.
આ T20 સિરીઝમાં બાબર આઝમના બેટમાંથી કોઈ ખાસ મોટી ઇનિંગ્સ જોવા મળી નથી. આ સીરીઝની ત્રીજી મેચમાં બાબરે ટી20 ઈન્ટરનેશનલમાં સૌથી વધુ રન બનાવવાના મામલે ભારતીય ટીમના વર્તમાન કેપ્ટન રોહિત શર્માને પાછળ છોડી દીધો હતો.
જોકે પાકિસ્તાનના ફેન્સને આશા હતી કે T20 વર્લ્ડ કપ પહેલા, તે વિરાટ કોહલીને પાછળ છોડી દેશે અને T20 ઇન્ટરનેશનલમાં સૌથી વધુ રન બનાવનાર બેટ્સમેન બની જશે, પરંતુ તેના 4000 રન પુરા કર્યા બાદ બાબર આ ઇનિંગમાં 36 રનના વ્યક્તિગત સ્કોર પર આઉટ થયો હતો અને કોહલી આ રેકોર્ડ તોડવાથી માત્ર 15 રન દૂર રહ્યો. બાબરના હવે 119 મેચમાં 41.05ની એવરેજથી કુલ 4023 રન છે.
વિરાટ કોહલી હાલમાં T20 ઈન્ટરનેશનલમાં સૌથી વધુ રન બનાવનાર બેટ્સમેન છે, તેના નામે 4037 રન છે, જ્યારે બીજા સ્થાને રહેલા બાબર આઝમ પાસે હવે આગામી T20 વર્લ્ડ કપમાં તેને પાછળ છોડવાની તક હશે.