જો રૂટે બ્રાયન લારાનો રેકોર્ડ તોડી ટેસ્ટ ક્રિકેટમાં આ ખાસ સિદ્ધિ મેળવી

ઈંગ્લેન્ડના દિગ્ગજ બેટ્સમેન જો રૂટે એજબેસ્ટન સ્ટેડિયમમાં વેસ્ટ ઈન્ડિઝ સામે ચાલી રહેલી ત્રીજી ટેસ્ટમાં મોટી સિદ્ધિ હાંસલ કરી છે. જો રૂટે મહાન બ્રાયન લારાને પાછળ છોડીને ટેસ્ટ ક્રિકેટના ઈતિહાસમાં સૌથી વધુ રન બનાવનાર સાતમો ખેલાડી બની ગયો છે.

આ પહેલા આ સ્થાન પર રહેલા બ્રાયન લારાએ પોતાની શાનદાર કારકિર્દી દરમિયાન 232 ઇનિંગ્સમાં 11,953 રન બનાવ્યા હતા. આ સિદ્ધિએ લારાને ઓલ ટાઈમ લિસ્ટમાં આઠમા સ્થાને ધકેલી દીધી છે. રૂટે અગાઉ વેસ્ટ ઈન્ડિઝના અન્ય મહાન ખેલાડી શિવનારાયણ ચંદ્રપોલને પાછળ છોડી દીધો હતો, જેણે 11,867 રન બનાવ્યા હતા.

રૂટે ડિસેમ્બર 2012માં ટેસ્ટ ક્રિકેટમાં પદાર્પણ કર્યું હતું અને ત્યારથી તે 143 ટેસ્ટ મેચ રમ્યો છે. તેણે 32 સદી અને 63 અડધી સદી ફટકારી છે. વર્તમાન શ્રેણીમાં તેનું પ્રદર્શન પણ સારું રહ્યું છે, તેણે છેલ્લી મેચમાં સદી અને વર્તમાન ટેસ્ટમાં અડધી સદી ફટકારી છે.

ટેસ્ટ ક્રિકેટમાં સૌથી વધુ રન બનાવવાનો રેકોર્ડ ભારતના સચિન તેંડુલકરના નામે છે, જેણે 200 મેચમાં 15,921 રન બનાવ્યા છે. ટેસ્ટમાં સૌથી વધુ સદી (51) અને અડધી સદી (68) ફટકારવાનો રેકોર્ડ પણ તેંડુલકરના નામે છે. તેના પછી ઓસ્ટ્રેલિયાના પૂર્વ કેપ્ટન રિકી પોન્ટિંગનો નંબર આવે છે, જેણે 168 ટેસ્ટ મેચમાં 13,378 રન બનાવ્યા છે.

દક્ષિણ આફ્રિકાના પૂર્વ ઓલરાઉન્ડર જેક કાલિસ 166 મેચમાં 13,289 રન સાથે ત્રીજા સ્થાને છે. તેના પછી ભારતના રાહુલ દ્રવિડનો નંબર આવે છે જેણે 164 ટેસ્ટ મેચમાં 13,288 રન બનાવ્યા છે. ઈંગ્લેન્ડનો એલિસ્ટર કૂક 161 ટેસ્ટ મેચમાં 12,472 રન સાથે પાંચમા સ્થાને છે.