ઈંગ્લેન્ડના બેટ્સમેન જો રૂટે ન્યૂઝીલેન્ડ સામેની પ્રથમ ટેસ્ટ મેચમાં ઈતિહાસ રચ્યો છે. જો રૂટ ટેસ્ટ ક્રિકેટની ચોથી ઇનિંગમાં સૌથી વધુ રન બનાવનાર બેટ્સમેન બની ગયો છે. જો રૂટે મહાન ભારતીય બેટ્સમેન સચિન તેંડુલકરના રેકોર્ડને પાછળ છોડી દીધો છે.
પ્રથમ ઇનિંગમાં ખાતું ન ખોલનાર જો રૂટે ન્યૂઝીલેન્ડ સામેની પ્રથમ ટેસ્ટની બીજી ઇનિંગમાં 23 રનની અણનમ ઇનિંગ રમી હતી, આ સાથે તે ટેસ્ટની ચોથી ઇનિંગમાં સૌથી વધુ રન બનાવનાર બેટ્સમેન બની ગયો હતો. ક્રિકેટ જો રૂટે સચિન તેંડુલકર (1625)ને પાછળ છોડીને ટેસ્ટ ક્રિકેટની ચોથી ઇનિંગમાં 1630 રન બનાવ્યા છે.
ટેસ્ટ ક્રિકેટમાં ચોથી ઇનિંગ્સમાં સૌથી વધુ રન:
1630 રન – જો રૂટ
1625 રન – સચિન તેંડુલકર
1611 રન – એલિસ્ટર કૂક
1611 રન – ગ્રીમ સ્મિથ
1580 રન – શિવનારાયણ ચંદ્રપોલ
ઈંગ્લેન્ડની ટીમે ક્રાઈસ્ટચર્ચમાં રમાયેલી પ્રથમ ટેસ્ટમાં ન્યૂઝીલેન્ડને આઠ વિકેટે હરાવીને ત્રણ મેચોની શ્રેણીમાં 1-0ની લીડ મેળવી લીધી છે. ન્યૂઝીલેન્ડની ટીમે કેન વિલિયમસનની 93 રનની ઇનિંગની મદદથી પ્રથમ ઇનિંગમાં 348 રન બનાવ્યા હતા, જેના જવાબમાં ઇંગ્લેન્ડની ટીમે હેરી બ્રૂકની શાનદાર સદી (171 રન)ની મદદથી પ્રથમ ઇનિંગમાં 499 રન બનાવ્યા હતા. ઈંગ્લેન્ડને પ્રથમ દાવમાં 151 રનની લીડ મળી હતી.