IPL 2024માં પોતાનું શાનદાર ફોર્મ ચાલુ રાખતા વિરાટ કોહલીએ ટૂર્નામેન્ટની 41મી મેચમાં પણ અડધી સદી ફટકારી હતી. સનરાઇઝર્સ હૈદરાબાદ સામેની આ મેચમાં વિરાટે 43 બોલમાં 4 ચોગ્ગા અને 1 છગ્ગાની મદદથી 51 રન બનાવ્યા હતા.
આ ઇનિંગમાં તેણે પોતાનો 21મો રન બનાવતાની સાથે જ વિરાટે એક મોટો રેકોર્ડ પોતાના નામે કરી લીધો.
વિરાટે આ સિઝનમાં 400થી વધુ રન બનાવ્યા છે અને IPLના ઈતિહાસમાં 10 સિઝનમાં 400થી વધુ રન બનાવનાર પ્રથમ ખેલાડી બન્યો છે. અગાઉ વિરાટ કોહલી અને સુરેશ રૈનાએ 9-9 વખત 400 રન બનાવ્યા હતા, પરંતુ હવે વિરાટ તેની IPL કરિયરમાં 10 સિઝનમાં 400 કે તેથી વધુ રન બનાવનાર પ્રથમ ખેલાડી બની ગયો છે.
એટલું જ નહીં વિરાટે આ મેચમાં વધુ એક રેકોર્ડ પોતાના નામે કર્યો. વિરાટે આ મેચમાં 51 રનની ઇનિંગ રમીને ઓપનર તરીકે પોતાના 4000 રન પણ પૂરા કર્યા હતા. હવે વિરાટ IPLના ઈતિહાસમાં 4000 રન બનાવનાર ચોથો ઓપનર બની ગયો છે. વિરાટ પહેલા શિખર ધવન, ડેવિડ વોર્નર અને ક્રિસ ગેલ આ સિદ્ધિ મેળવી ચૂક્યા છે.