લખનૌ સુપર જાયન્ટ્સના ફાસ્ટ બોલર મયંક યાદવની ઈજાને લઈને એક મોટું અપડેટ સામે આવ્યું છે. મયંક યાદવ હિપ જકડાઈ જવાને કારણે આગામી બે મેચ રમી શકશે નહીં. લખનૌ શુક્રવારે દિલ્હી કેપિટલ્સ સામે ટકરાશે, ત્યારબાદ ટીમ તેની આગામી મેચ 14 એપ્રિલે કોલકાતા સામે રમશે.
લખનૌના કોચ જસ્ટિન લેંગરે આશા વ્યક્ત કરી હતી કે મયંક 19 એપ્રિલે ચેન્નાઈ સુપર કિંગ્સ સામેની મેચ સુધીમાં સંપૂર્ણ રીતે ફિટ થઈ જશે. તેણે કહ્યું, અમને આશા છે કે તે 19 એપ્રિલ સુધી ફિટ થઈ જશે, અમે ઈચ્છીએ છીએ કે તે દરેક મેચ રમે, તે ખૂબ મહેનત કરી રહ્યો છે પરંતુ તે આવતીકાલની મેચ રમી શકશે નહીં.
150 કિમીની ઝડપે બોલ ફેંકીને આઈપીએલ ડેબ્યૂમાં સનસનાટી મચાવનાર મયંકે રવિવારે ગુજરાત ટાઇટન્સ સામે એક ઓવર ફેંક્યા બાદ મેદાન છોડી દીધું હતું. લેંગરે કહ્યું, તેના હિપમાં જડતા છે, તેને ગુજરાત સામે એક ઓવર બોલિંગ કર્યા પછી લાગ્યું, અમે એમઆરઆઈ કરાવ્યું જેમાં થોડો સોજો દેખાયો, અમને આશા છે કે તે જલ્દી મેદાનમાં પાછો ફરશે.
ઈજાના કારણે છેલ્લી બે મેચમાંથી બહાર રહેલા ડાબા હાથના ફાસ્ટ બોલર મોહસીન ખાન અંગે તેણે કહ્યું કે, તે આવતીકાલે ઉપલબ્ધ હોઈ શકે છે પરંતુ તેને કોલકાતામાં મેદાનમાં ઉતારવામાં આવી શકે છે.