આરસીબીની ટીમ આ સિઝનમાં પણ વિનિંગ ટ્રેકથી દૂર જણાય છે. વિરાટ કોહલી ફોર્મમાં હોવા છતાં સતત ત્રણ મેચમાં મળેલી હાર પર સવાલો ઉઠી રહ્યા છે.
ઓસ્ટ્રેલિયાના ક્રિકેટર સ્ટીવ સ્મિથે આ અંગે એક મોટી વાત કહી છે. સ્મિથે કહ્યું કે ટીમના અન્ય બેટ્સમેનો સારું પ્રદર્શન કરી રહ્યા નથી. આ કારણે વિરાટ કોહલી પર ઘણું દબાણ આવી રહ્યું છે. તેણે કહ્યું કે ટીમના અન્ય બેટ્સમેનોએ પણ કોહલીને સપોર્ટ કરવો જોઈએ, તો જ વસ્તુઓ ઉકેલાશે.
આંકડાઓની વાત કરીએ તો વિરાટ કોહલીએ આ સિઝનમાં આરસીબી માટે ચાર મેચમાં 67.66ની એવરેજથી 203 રન બનાવ્યા છે. તેના પછી બીજા નંબર પર દિનેશ કાર્તિક છે જેના ખાતામાં માત્ર 90 રન છે. આ સિવાય ટીમના અન્ય મોટા નામો ગ્લેન મેક્સવેલ, ફાફ ડુ પ્લેસિસ અને કેમેરોન ગ્રીનના બેટ ચૂપ રહ્યા છે. કોહલીના સારા ફોર્મ છતાં આરસીબી ચારમાંથી ત્રણ મેચ હારી છે. ટીમ પોઈન્ટ ટેબલમાં સાતમા સ્થાને છે. સ્મિથે ધીમી સ્ટ્રાઈક રેટને લઈને કોહલીની ટીકાને ફગાવી દીધી અને કહ્યું કે દુનિયાનો કોઈ ખેલાડી કોહલીથી સારી પરિસ્થિતિને સમજી શકે નહીં.
સ્ટાર સ્પોર્ટ્સની કોમેન્ટ્રી ટીમના સભ્ય સ્મિથે ચેનલના સ્ટુડિયોમાં કહ્યું કે અન્ય અગ્રણી બેટ્સમેનોએ તેને ટેકો આપવો જોઈએ. આમ કરીને તેઓ ટીમને જીતના માર્ગ પર લાવી શકે છે. આ સમયે તમામ દબાણ માત્ર વિરાટ પર છે. તેણે કહ્યું કે ટોપ અને મિડલ ઓર્ડરના બેટ્સમેનોએ તેની મદદ કરવી જોઈએ. તેણે શાનદાર શરૂઆત કરી છે, પરંતુ તેને સમર્થનની જરૂર છે. તે એકલો દરેક મેચમાં રન બનાવી શકતો નથી.