IPL 2026નું લીગ સ્ટેજ પૂર્ણ થયા બાદ હવે પ્લેઓફની ચાર ટીમો નક્કી થઈ ગઈ છે, જેમાં 2008ની ચેમ્પિયન Rajasthan Royalsનો પણ સમાવેશ થાય છે. જોકે પ્લેઓફમાં સ્થાન મળ્યા બાદ ટીમ માટે એક મોટી ચિંતા સામે આવી છે. રાજસ્થાનના બે મહત્વપૂર્ણ ખેલાડી રવિન્દ્ર જાડેજા અને કેપ્ટન રિયાન પરાગ ઇજાઓ વચ્ચે રમતા હોવાનો ખુલાસો થયો છે.
રાજસ્થાન રોયલ્સના હેડ કોચ Kumar Sangakkaraએ જણાવ્યું કે જાડેજા છેલ્લા કેટલાક સમયથી ઇજાથી પરેશાન છે અને ટીમ તેને ખૂબ સાવધાનીપૂર્વક મેનેજ કરી રહી છે. મુંબઈ ઇન્ડિયન્સ સામેના મહત્વપૂર્ણ મુકાબલામાં જાડેજાએ ઇમ્પેક્ટ સબસ્ટિટ્યૂટ તરીકે વાપસી કરી હતી. તેણે માત્ર 11 બોલમાં 19 રનની ઉપયોગી ઇનિંગ રમીને ટીમની જીતમાં મહત્વપૂર્ણ ફાળો આપ્યો હતો.
જાડેજા આ પહેલા દિલ્હી કેપિટલ્સ અને લખનૌ સુપર જાયન્ટ્સ સામેની મેચમાં રમ્યા નહોતા. મીડિયા રિપોર્ટ મુજબ તે ઘૂંટણ અને કોણીની સમસ્યાથી પીડાઈ રહ્યા છે. સંગાકારાએ કહ્યું કે લાંબા સમય સુધી બેટિંગ કરવાથી તેના શરીર પર વધુ દબાણ પડે છે, તેથી ટીમ તેને સંભાળીને ઉપયોગમાં લઈ રહી છે.
બીજી તરફ કેપ્ટન Riyan Paragએ પણ સ્વીકાર્યું કે સંપૂર્ણ રીતે ફિટ નહોતા છતાં ટીમ માટે રમ્યા હતા. મુંબઈ સામેની જીત બાદ પરાગે કહ્યું કે આ માત્ર માનસિક મજબૂતી હતી, કારણ કે તેને આ મેચ રમવાની પણ શક્યતા ઓછી હતી.
પરાગે જાડેજાની ફિટનેસ અંગે કહ્યું કે “જડ્ડુ ભાઈને થોડી સમસ્યાઓ છે, પરંતુ તેઓ યોદ્ધા છે અને જલ્દી મજબૂત વાપસી કરશે.”
હવે પ્લેઓફમાં રાજસ્થાન રોયલ્સનો મુકાબલો 27 મેના રોજ Sunrisers Hyderabad સામે મુલ્લાંપુરમાં રમાશે. ટીમ મેનેજમેન્ટને આશા છે કે બંને ખેલાડી નોકઆઉટ મેચ પહેલા સંપૂર્ણ રીતે ફિટ થઈ જશે.