એમઆઇ સામે યશસ્વીએ તાબડતોબ રેકોર્ડ, આવું કરનાર પ્રથમ ખેલાડી બન્યો

યશસ્વી જયસ્વાલે મુંબઈ ઈન્ડિયન્સ સામે શાનદાર સદી ફટકારી હતી, જેના કારણે રાજસ્થાન રોયલ્સ ટીમે 9 વિકેટે આસાનીથી જીત મેળવી હતી.

આ મેચમાં પ્રથમ બેટિંગ કરતા મુંબઈની ટીમે 179 રન બનાવ્યા હતા. જેને રાજસ્થાનની ટીમે 19મી ઓવરમાં જ સરળતાથી હાંસલ કરી લીધી હતી. યશસ્વી જયસ્વાલે આ મેચમાં સદીની ઇનિંગ રમીને એક મોટો રેકોર્ડ પોતાના નામે કરી લીધો છે.

યશસ્વી જયસ્વાલે મેચમાં 60 બોલમાં 104 રનની ઇનિંગ રમી હતી. આ દરમિયાન તેણે 6 છગ્ગા અને 9 ચોગ્ગા ફટકાર્યા હતા. આ સદી સાથે યશસ્વીના નામે એક ખૂબ જ રસપ્રદ રેકોર્ડ નોંધાયો છે.

યશસ્વી 23 વર્ષની ઉંમર પહેલા IPLમાં બે સદી ફટકારનાર પ્રથમ ખેલાડી છે. યશસ્વીએ 2023માં વાનખેડે સ્ટેડિયમમાં મુંબઈ ઈન્ડિયન્સ સામે આઈપીએલમાં પોતાની પ્રથમ સદી ફટકારી હતી. તેણે 124 રનની ઇનિંગ રમી હતી. તે સમયે તેમની ઉંમર 21 વર્ષ 123 દિવસ હતી.

IPLમાં યશસ્વીની બીજી સદી પણ મુંબઈ ઈન્ડિયન્સ સામે આવી હતી. યશસ્વીએ 22 વર્ષ અને 116 દિવસની ઉંમરમાં આ સદી ફટકારી છે. મુંબઈ સામેની સદી બાદ યશસ્વીએ કહ્યું કે મેં ખાતરી કરી કે મેં બોલને યોગ્ય રીતે જોયો અને ક્રિકેટિંગ શોટ્સ રમ્યો.

યશસ્વીએ કહ્યું હતું કે હું જે શ્રેષ્ઠ કરું છું તે કરવાનો પ્રયાસ કરું છું. ક્યારેક તે વધુ સારા પરિણામો આપે છે અને ક્યારેક તે નિરાશા તરફ દોરી જાય છે. હું બહુ વિચારતો નથી. હું તમામ વરિષ્ઠોનો આભાર માનું છું, તેઓએ મને માર્ગદર્શન આપ્યું.

મને તક આપવા બદલ હું રાજસ્થાન રોયલ્સ મેનેજમેન્ટ અને સંગાકારા સર, સંજુ સેમસનનો આભાર માનું છું. હું પ્રેક્ટિસ સેશનમાં મારું બધું આપવાનો પ્રયત્ન કરું છું.