ભારતીય મહિલા ક્રિકેટ ટીમની કેપ્ટન હરમનપ્રીત કૌરે લોર્ડ્સના ઐતિહાસિક મેદાન પર વધુ એક યાદગાર સિદ્ધિ પોતાના નામે નોંધાવી છે. ઇંગ્લેન્ડ સામે રમાઈ રહેલી એકમાત્ર ટેસ્ટ મેચમાં હરમનપ્રીતે શાનદાર 58 રનની ઇનિંગ્સ રમી અને ક્રિકેટના ‘હોમ ઓફ ક્રિકેટ’ તરીકે ઓળખાતા લોર્ડ્સમાં એક અનોખો વિશ્વસ્તરીય રેકોર્ડ બનાવ્યો. તે હવે લોર્ડ્સમાં ટેસ્ટ, વનડે અને ટી20 – ત્રણેય આંતરરાષ્ટ્રીય ફોર્મેટમાં અડધી સદી ફટકારનાર પ્રથમ ભારતીય ક્રિકેટર બની ગઈ છે. આ સિદ્ધિ પુરુષ અને મહિલા બંને ક્રિકેટરોમાં કોઈ ભારતીય હાંસલ કરી શક્યો નહોતો.
હરમનપ્રીતે પોતાની ઇનિંગ દરમિયાન 121 બોલમાં 58 રન બનાવ્યા, જેમાં સાત આકર્ષક ચોગ્ગાનો સમાવેશ થયો હતો. તેણે સ્મૃતિ મંધાના અને દીપ્તિ શર્મા સાથે મહત્વપૂર્ણ ભાગીદારી કરીને ભારતની ઇનિંગ્સને મજબૂત આધાર આપ્યો. સ્મૃતિ મંધાનાએ 83 અને દીપ્તિ શર્માએ 57 રનની મહત્વપૂર્ણ ઇનિંગ્સ રમી હતી, જેના કારણે ભારતીય ટીમ પ્રથમ ઇનિંગ્સમાં 285 રન સુધી પહોંચી હતી.
હરમનપ્રીત માટે આ મેચ અનેક રીતે ખાસ રહી. થોડા સમય પહેલાં જ તેણે આંતરરાષ્ટ્રીય ક્રિકેટમાં 9000થી વધુ રન પૂર્ણ કરનાર ત્રીજી ભારતીય મહિલા ક્રિકેટર બનવાનો રેકોર્ડ બનાવ્યો હતો અને હવે લોર્ડ્સમાં વધુ એક ઐતિહાસિક સિદ્ધિ ઉમેરી છે. છેલ્લા કેટલાક વર્ષોમાં તેની સતત શાનદાર બેટિંગ અને સફળ નેતૃત્વના કારણે ભારતીય મહિલા ક્રિકેટને વૈશ્વિક સ્તરે નવી ઓળખ મળી છે.
લોર્ડ્સમાં મહિલા ટેસ્ટના ઐતિહાસિક પ્રસંગે હરમનપ્રીતની આ ઇનિંગ્સ માત્ર વ્યક્તિગત સિદ્ધિ નથી, પરંતુ ભારતીય મહિલા ક્રિકેટ માટે ગૌરવની ક્ષણ પણ છે. તેની આ સિદ્ધિ દર્શાવે છે કે ભારતીય મહિલા ક્રિકેટરો હવે વિશ્વ ક્રિકેટમાં નવા માપદંડ સ્થાપિત કરી રહ્યા છે. ક્રિકેટ ચાહકો અને પૂર્વ ખેલાડીઓએ પણ હરમનપ્રીતની આ ઐતિહાસિક સિદ્ધિ બદલ સોશિયલ મીડિયા પર અભિનંદનનો વરસાદ કર્યો છે.
लॉर्ड्स में भारत-इंग्लैंड टेस्ट के दौरान हरमनप्रीत कौर ने 58 रन की पारी खेलकर इतिहास रच दिया. वह लॉर्ड्स के मैदान पर तीनों फॉर्मेट में अर्धशतक लगाने वाली पहली भारतीय क्रिकेटर बन गई हैं. इससे पहले विराट कोहली, सचिन तेंदुलकर और मिताली राज जैसे दिग्गज भी यह उपलब्धि हासिल नहीं कर… pic.twitter.com/ltNQIwH33M
— ABP News (@ABPNews) July 11, 2026