દિલ્હી કેપિટલ્સ અને બંગાળના યુવા ક્રિકેટર અભિષેક પોરેલની મુશ્કેલીઓમાં વધારો થયો છે. એક મેડિકલ વિદ્યાર્થીની દ્વારા કરવામાં આવેલી ગંભીર ફરિયાદ બાદ ધરપકડ કરાયેલા પોરેલના કેસમાં કલકત્તા હાઈકોર્ટે સુનાવણી 14 સપ્ટેમ્બર સુધી મુલતવી રાખી છે. રાજ્ય સરકાર અને પોલીસે તપાસ આગળ વધારવા માટે વધુ સમય માંગ્યો હતો, જેના પગલે કોર્ટે આ નિર્ણય લીધો.
મળતી માહિતી મુજબ, કર્ણાટકની એક મેડિકલ વિદ્યાર્થીનીએ પોરેલ વિરુદ્ધ ફરિયાદ નોંધાવી હતી. ફરિયાદમાં આરોપ મૂકવામાં આવ્યો છે કે બંને લગભગ સાડા ત્રણ વર્ષથી સંબંધમાં હતા અને પોરેલે લગ્નનું વચન આપીને શારીરિક સંબંધ બનાવ્યા હતા. બાદમાં તેણે સંબંધ સ્વીકારવાનો ઇનકાર કર્યો હોવાનો પણ આરોપ છે. ફરિયાદમાં મારપીટ, ધમકી અને ખાનગી તસવીરો જાહેર કરવાની ધમકી જેવા આક્ષેપો પણ કરવામાં આવ્યા છે. પોરેલે અગાઉ પોતાના પર લાગેલા આરોપોને નકારી કાઢ્યા હતા.
ફરિયાદ બાદ પોલીસે તપાસ શરૂ કરી હતી. પોરેલ પોતાના ચંદનનગર સ્થિત નિવાસસ્થાને મળી ન આવતા ફરિયાદી યુવતીએ હાઈકોર્ટનો સંપર્ક કર્યો હતો. ત્યારબાદ કોર્ટે પોલીસને પોરેલની ધરપકડ કરવા અને તેના ઇલેક્ટ્રોનિક ઉપકરણો જપ્ત કરવાનો નિર્દેશ આપ્યો હતો. પોલીસે અંતે સોમવારે રાત્રે તેની ધરપકડ કરી હતી. ત્યારબાદ સ્થાનિક કોર્ટે તેમને પોલીસ કસ્ટડીમાં મોકલ્યા હતા.
હવે કેસની આગામી સુનાવણી 14 સપ્ટેમ્બરે થશે. પોલીસને તપાસ દરમિયાન ઇલેક્ટ્રોનિક ડિવાઇસની ફોરેન્સિક તપાસ સહિતની કાર્યવાહી પૂર્ણ કરવાની છે. આ કેસમાં પોરેલના એક મિત્રનું નામ પણ સામે આવ્યું છે, જે હજુ પોલીસની પકડથી બહાર છે. પોલીસ તેની શોધખોળ કરી રહી છે.
કોર્ટની આગામી સુનાવણીમાં તપાસની પ્રગતિ અંગે રિપોર્ટ રજૂ થવાની શક્યતા છે. હાલ આ સમગ્ર મામલો કોર્ટમાં વિચારાધીન છે અને આરોપો અંગે અંતિમ નિર્ણય આવવાનો બાકી છે.
Abishek Porel’s Friend Still On The Run In Assault Case; Hearing Deferred To September 14#AbhishekPorel #Cricket https://t.co/eIWGliOFUe
— News18 (@CNNnews18) August 11, 2026